Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CXII.

Vanden nuwen regimente dwelcke die van Bruesele ende van tShertoghen Bossche niet en hebben bezeghelt.

Int selve iaer vore verclaert
Wert ghehouden meneghe dachvaert
Van den drien staten van Brabant
Te Lovene, daer si samenderhant
Vele poenten overdroeghen, segghic di,
Ende ordinancien, die si
Nuemden tnuwe regement,
Twelke ghesloten wert ende gheent
Twelve daghe in meie, doe
Haer consent droeghen daer toe
Hertoghe Jan volcomelike
Entie drie staten samentlike,
Sonder Bruessele alleene, si u bekant.
Mids den welken die hertoghe sant
Van der Lecke heer Heinrike
Sinen hofmeester ende derghelike
Ywein de Mol ter selver stonde,
Sinen cokenmeester, ende meester Emonde
Van Dynter sinen secretarijs
Te Bruessele, hen te doene onderwijs
Dat si haer consent sonder verhouden
Metten anderen daer in draghen wouden
Van den drien staten, ende met hen
Dat bezeghelen meer ende men;
Dies men te Bruessele, soe ic oorconde,
In gheender wijs verwerven en conde.
Dus es bezeghelt tnuwe regement
Met shertoghen zeghele, dat versent;
Entie voorseide meester Emont
Wert ghesonden te dier stont
Aen die prelate al omme, dat wet,
Baenrotsen, ridderen ende edele met,
Aen alle vriheiden, aen alle steden,
Om te bezeghelen; welc si deden,
Sonder Bruessele, die niet, hoort mi saghen,
Haer consent en hadden daer in ghedraghen,
Ende sonder den Bossche, dit wilt onthouden,
Diet ooc bezeghelen niet en wouden;
Hoe wel nochtan, sijt seker das,
[t] Daer ghemaect ende ghesloten was
Bi haren ghedeputeerden, dats waer.
Maer meester Emont, die aldaer
Die carte brachte, sijt seker das,
Om te bezeghelen, die was
In sorghen, in vreesen van sinen live;
Want die ghemeinte riepen stive
Ende spraken roekeloos sonder si
Te hem waerts, ghelikerwijs oft zi
Metter carten hem souden te verliese
Gheworpen hebben in die Diese.
Maer hi stelde al sijn ghedochte
Uter stat te comene soe hi ierst mochte;
Ende als hi uut riden soude,
Soe clopten die smede herde boude
Met haren hameren vreeselijc,
Ende die cleedermakers derghelijc
Met haren sceeren, dat es waer,
Ende die scoenmakers hier ende daer
Met haren snimessen ende leesten.
Meester Emonde meshaeghde der feesten.
Desghelijc ooc met wreetheden
Ander ambachtsliede deden
Met haren wapenen, dit vernem,
Ende instrumenten, roepende op hem:
‘Dats de man, dats de man, sijts ghewes,
Metter carten!’ ende alsoe es
Dat voorseide nuwe regement
Noch heden sdaeghs, dat ghijt versent,
In der stat van den Bossche, wilt weten,
Meester Emonts Carte gheheeten.
Des vridaeghs opten VII^sten dach
Der maent van oeghste, doe ic ghewach,
Trac hertoghe Jan, si u verclaert,
Van Loven te Turnhout waert.
Tot XVII der maent vorscreven
Es die hertoghe aldaer bleven.
Tot Lovene trac hi weder daer naer
Ende ter Vueren tooch hi van daer
Ende weder te Lovene, wilt versinnen,
Ende van daer te Halle binnen,
Ende van Halle, soe eest bescreven,
Weder te Lovene; daer es hi bleven
Tot XIX in novembri.
Ende tallen desen plaetsen, segghic di,
Tooch ende lach die hertoghe rike
Jaghen[de] ende anders desghelike
Ghenuechten hanterende, soe ic vernam,
Soe sijnre herten dat bequam.