Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CX.

Hoe de vrouwe Jacoba die hertoghinne haer verselde metten hertoge van Gloucester ende hoe sy hen niet vueghen en wouden totten appoentemente daerop gheraempt.

Hier boven daert hoorde, dat elc versta,
Es ghescreven hoe vrouwe Jacoba
Die hertoghinne sonder verdrach
Int iaer twintich, opten VII^sten dach
Der maent van meerte, sonder oorlof
Heeft gheruumt haers heeren hof
Ende ghesellen, si u bekant,
Hertoghen Jans van Brabant,
Ende es uut Henegouwe ongheloghen
Tot in Inghelant ghetoghen.
Ende (haer) daer afwesende sonder letten
Deet se int hof van Roome voortsetten
Dat tusscen hertoghe Janne ende hare
Engheen wettich huwelijc en ware;
Ende verwerf aen den paus, segghic di,
Merten den vijfsten alsoe, dat hi
Die zaken int hof groot ende smal
Sekeren rechteren beval
Te wetene den cardinael
Van Urzine, ende alsoe wael
Den cardinael van Venegien.
Welke cardinalen ende rechteren
Van Vrouwe Jacoppen weghen vorseit
Daer toe versocht, hebben ghereit
Hertoghe Janne sonder verdraghen
Int hof ieghen haer doen daghen.
Ende als gheexequeert was
Die citatie, sijt seker das,
Heeft hertoghe Jan altehant
Bi rade sijns lants van Brabant
Ende van Henegouwe daer met
Sekere procureurs gheset
Ende hen volcomen macht ghegheven
Hem te bescuddene in der zaken voorscreven,
Ende hem te verantwoordene, hier op goome,
Metten rechte in den hove van Roome
Als Vrouwe Jacoba verneemt tehant
Dat hertoghe Jan van Brabant
Hem keert ten rechte, ende des
Te verwachtene ghetroost es:
En verbeit si, wats ghesciet,
Tvonnesse der Heileger Kerken niet;
Maer verselt haer haestelike
In scine van rechten huwelike,
Als oft si engheenen man
Levende en hadde, hout u daer an,
Metten hoogh gheborenen
Hunfride, verstaet den sen,
Hertoghe van Gloucestere ghenant,
Brueder des conincs van Inghelant;
Daer af leider! namaels int fijn
Vele scanden ende plaghen comen sijn.
Ende want van Inghelant die coninc hooghe
Ter eendere, ende die hertoghe
Van Bourgognen ter ander ziden,
Aensaghen dat in toecomenden tiden
Groote plaghen daer af mochten ghescien,
Hadden si gherne daer op versien,
Ende wijsheit ghekeert daer vore:
Soe sonden si hare ambassiatore
Aen beiden die partien vore ghenant.
Soe dat hertoghe Jan van Brabant
Wesende te Halle, soe wi vernamen,
Dese heeren hier naer bi hem quamen:
Heer Hughe van Lanoy, dat ghijt wet,
Ende heer David van Brumuel daer met,
Van weghen des conincs rike
Van Inghelant ende derghelike
Van des hertoghen weghen voorscreven
Van Bourgognien, sijns neven,
Versuekende, begheerende dat hi
Van der zaken hanghende, segghic di,
In den hove van Roome, wilt versinnen,
Tusscen Vrouw Jacoppen siere ghesellinnen
Ende hem, des wilde submitteren
In de voorgenoomde heeren
Van Inghelant ende van Bourgognien,
In der vueghen, dat elc van hen
Twee clerke soude kiesen uutvercoren,
Die haer meininghe souden hooren,
Ende ondervinden die waerheit
Claerlijc van der zaken voorseit,
Overnemende alle letteren,
Munimenten, besceit, daer met si hen
Souden willen behelpen, ende al dat dinc
Bringhen bi den coninc
Ende bi den hertoghe, dat segghic di,
Om teenen zekeren daghe, die[n] si
Beiden den partien voorseit
Beteekenen souden, met ondersceit,
Bi rade ende bi advise
Van notabelen clerken ende wise
Daer op te ordinerene wiselijc
Tghene dat hen oorboorlijc
Soude dunken, si u verclaert,
Ter eeren ende ter welvaert
Van hem beiden, hoort mi lien;
Ende dat beide die selve partien
Vervolghen souden beide te gader
Dat die paus ons Heileghe Vader
Believen soude ende confirmeeren,
Tghene dat die voorseide heeren,
Die coninc entie hertoghe vore vercleert
Daer af souden hebben gheordineert.
Overmids dat hertoghe Jan int fijn
Aensach dat die neve sijn,
Van Bourgognen die heere Meinyoot,
Hier inne hadde begheerte groot,
Ende dat ooc tvoorseide, sijt seker das,
Apoentement gheraemt was
Bi rade sijns brueders, segghic di,
Van Saint Pol ende van Liney,
Ende des biscoppen van Terenborch,
Ende heeren Jans van Lutzenborch,
Sijns neven. Ende om, dat ghijt verstaet,
Te scuwene allen onraet
Diere namaels af comen mocht,
Heeft hem die hertoghe alsoe bedocht
Van Brabant, dat hi sijn consent
Daer inne droech, si u bekent,
Soe verre als met rechte mocht wesen;
Ende Vrou Jacob sghelijcs in desen
Ooc dade, ende anders niet.
Te Halle soe es dit ghesciet
Int selve iaer, doe ic ghewach,
In meerte, opten XII^sten dach.
Maer al was, si u becant,
Des conincs brueder van Inghelant
Die hertoghe van Gloucestere, dats waer
Soe en wouti nochtan niet aen nemen daer
Tapoentement, dat elc versta,
Noch ooc mede Vrouwe Jacoba,
Die en woudes niet nemen an.
Dus sant daer na hertoghe Jan
Eenen sijnre heraude, wilt weten,
Die bi namen Limborch was gheheeten
Over tot in Inghelant,
Om te vernemene tghestant
Van allen zaken, die waerhede.
Den welken die hertoghe dede
Van Gloucestere vanghen daer
Ende ter coorden trecken voor waer,
Ende qualijc tracteren sonder si;
Maer ten utersten soe wert hi
Bi helpen quite, si u bekant,
Des cardinaels van Inghelant,
Daer met dat hi in tiden voor desen
Te Jherusalem hadde ghewesen.