Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CIX.

Hoe de hertoghe trac tot tShertoghen Bossche ende wat men daer dede ende waer hi daer na ghetoghen es.

Des vridaeghs XXI, hout u daer an,
Der maent novembri, trac hertoghe Jan
Van Lovene tot Heerentals ende tsiere eere
Wert hi daer ierst ghehult als heere.
Des anderdaeghs tooch hi van daer
Tot Turnhout, ende daer naer
Bleef hi daer een maent of daer bi,
Ende binnen dien tide ontboot hi
Die baenrotsen ende dedele mede
Ende die ghedeputeerde der stede
Lovene, Bruessele ende Antwerpen.
Ende na dat si onder hen
Te Turnhout bi hem comen waren,
Begheerde die hertoghe, hoort mi verclaren,
Ende versochte hem tsier houden
Dat si met hem voort riden wouden
Toten Bossche meer ende men.
Dus es hi metten edelen
Ende ghedeputeerden der steden
Van Turnhout toten Bossche ghereden.
Daer quam hi des dijnsdaeghs, segghic di,
Drientwintich in novembri.
Tien daghe bleef hi daer, dits waer,
Ende hielt thooghetide aldaer
Van Kersmisse met weerdicheit;
Binnen welken tide voorseit
Men daer tracteerde van vele zaken
Onder dandere, met waerder spraken,
Bracht die joncheere van Boxstel,
Ende heer Willem van Ghent soe wel,
In den handen altehant
Der drie staten van Brabant
Eenen brief, hout u daer an,
Die[n] si voormaels van den hertoghe Jan
Verworven hadden op tregement
Der stat van den Bossche, si u bekent,
Welken brief bi den staten wert saen
Ghecanceleert ende te nieute ghedaen.
Ende boven dien, verstaet den sen,
Soe submitteerden ende keerden hen
Die joncheere van Boxstel, ende ooc mede
Heer Willem van Ghent, ter selver stede,
Van haren excessen ende mesgripen
Ter ordenancien blooteliken
Van den tween weerliken staten
Des lants van Brabant in alder maten.
Ooc aldaer overdraghen wert
Dat van Sevenberghen joncheere Aert
Castelein van Hoesdein, dit onthoude,
Goede borghen setten soude
Om die stat, tslot, tlant te waren
Van Hoesdein te houdene ende te bewaren,
Ende over te leveren, si u bekant,
Tot slants behoef van Brabant,
Met voorwaerden overdraghen
Dat men hem tot zekeren daghen
Vernueghen soude volcomelijc
XIIII^m cronen van Vrankerijc.
Ende voort wert overdraghen daer,
Dat men tslot, dit hout voor waer,
Van Sinte Gheertrudenberghe na dien
Provancheeren soude ende wel versien
Van allen behoeften, ende bewaren tehant
Tot slants behoef van Brabant;
Ende dat Loven ende Bruessel die stede,
Antwerpen ende van den Bossche mede
Tghelt daer af, nu hoort mi segghen,
Leenen souden ende verlegghen;
Ende ooc Aernde van Sevenberghen voorseit
Gheloften doen met zekerheit,
Die somme van XIIII^m croonen
Tot sekeren daghen sonder hoonen
Te betalen; welke somme, dat wet,
Van den Berghe ende van Hoesdein met,
Men den voorseiden steden, dit onthoude,
Van haren taxe afcorten soude
Ende aenghedeilte van der bede voorseit,
Die den hertoghe met eendrechticheit
Van sinen lande vore vercleert
Toegheseit was ende gheconsenteert.
Na dat dese saken voor ghenaemt
Ende meer andere waren gheraemt
Ende overdraghen, es hertoghe Jan
Metten edelen ende ooc voort an
Metten ghedeputeerden der steden
Des vridaeghs van den Bossche ghereden
In januario den tweesten dach.
Tot Turnhout reet hi sonder verdrach;
Daer bleef die hertoghe alsoe
Tot XVI in januario.
Doen tooch hi tAntwerpen sonder bliven.
Daer hatti een dachvaert doen bescriven
Van den drien staten vore verclaert.
Ten sceidene van dier dachvaert,
Op Sinte Pauwels dach ongheloghen,
Es die hertoghe weder ghetoghen
Tot Turnhout, ende hi bleef daer
Tot opten derden dach, dits waer,
Der maent februari.
Dies selfs daeghs van daer sciet hi
Ende trac tot Herenthals, ende soe voort
Van daer te Lovene, dits waer woort.
Daer bleef hi tot opten XI^sten dach
Der selver maent, doe ic ghewach.
Van Lovene trac hi, dit es waer,
Te Halle binnen, ende aldaer
Bleef hi ligghende eenpaerlijc
Met sinen state eerbaerlijc
Seven weken tijts oft meere
Stateliken als een Heere.