Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CVIII.

Hoe de greve van Simpoul truwaertscap overgaf, ende hoe de hertoge tregement van sinen lande van Brabant selve aenveerde.

Na al des ghi vore hebt verstaen,
Es die greve van Saint Pol afghegaen
sRewaertscaps ende [heeft] overghegheven;
Ende hertoghe Jan, sijn broeder voorscreven,
Wert bi den drien staten onghelet
Weder ontfanghen ende gheset
Toter administratien tehande
Ende regimente van sinen lande;
Ende waren hem voortane bereit
Te doene volcomen ghehoorsaemheit;
Ende een bede daertoe meere
Consenteerden si haren heere
Hertoghe Janne te diere tijt
Van honderd duust, des seker sijt,
Ende LXX duust Fransce croonen,
Om sinen staet met te verscoonen,
Tot sekeren terminen sonder falen
Met besprokenen voorwaerden te betalen.
Ende joncheere Inghelbrecht
Greve te Nassouw, verstaet te recht,
Heere ter Leck ende te Breda;
Jan heere te Rotselaer daer na,
Van Vorselaer, van Rethy heere;
Jan van Schoonvorst ende ooc meere
Borchgreve te Montjouwe sekerlike,
Heere van Cranendonc, van Diepenbeke;
Jan van Glimes, des neemt goom,
Heere te Berghen opten Zoom,
Van Grimberghen ende van Melijn,
Ende die steden, dits waerheit fijn,
Lovene, Bruessele, Antwerpen met,
Ende sHertoghenbossche, dat wet,
Gheloofden in den name tehant
Der drie staten van Brabant
Den greve van Saint Pol bi trouwen
Costeloos, scadeloos te houwen
Van allen costen, wilt mi verstaen,
Die hi int rewaertscap hadde ghedaen
Tot opten lestledenen dertiensten dach
Van meie, alsoe men claer sien mach,
In den brieven die daer af sijn bescreven,
Die te Lovene worden ghegheven
XXVIII in october, wet voor waer,
XIIII^c XXI Ons Heeren iaer.
Ende dese gheloften die heeren deden,
Ende desghelijcs die goede steden,
Overmids dat hertoghe Jan, dits waer,
Toeseide ende willecoorde claer
Dat men alle coste voorleden
Betalen soude van der beden
Die hem sijn lant, alst es vercleert,
Van Brabant hadde gheconsenteert;
Ende desen achtervolghende al,
Die voorseide hertoghe Jan beval
Hermanne van den Assche, hoort dat,
Die[n] wisseleere van der stat
Van Bruessele, dat elc wel onthoude,
Van den ghelde dat comen soude
Van der bede, dits waerheit fijn,
Te ghevene den brueder sijn,
Den grave van Saint Pol, wilt verstaen,
Voor die costen die hi hadde ghedaen
In den rewaertscape, effen juust
Fransce croonen eenentwintich duust.
Desghelijcs beval hi met gheere
Janne Gielijs, der stat wisseleere
Van Lovene, ende van Antwerpen met
Den wisseleere, dat ghijt wet,
Ende elken van hen, te doene soe,
Tot eenre grooter summen toe,
Alsoe die brieve claerlijc rueren,
Die daer af worden ghemaect tier uren
Int selve jaer, doe ic ghewach,
In novembri den XIX^sten dach.