Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CVI.

Hoe de XJJJJ notabele persoene die te voren tot diversen plaetsen ghevuert waren, weder te Bruesele bracht syn ende daer alle vanden live ghericht.

Als nu der stat vore verclaert
Van Bruessele aldus verleent waert
Tprivilegium daer wi eer af seden,
Soe warens die goede liede te vreden,
Alst sceen, van herten herde zeere;
Ende mids dien hadde men te meere
Compassie ende medelidentheit
Op die ghene die bi den staten voorseit
Des lants van Brabant, hoort mi verclaren,
Ghedoemt ende veroordeelt waren
In ewegher ghevanghenessen.
Ende mids deser ontfermenessen,
Was men hem wat, als ghi mooght hooren,
Ghevoechliker dan plach te voren;
Ende zunderlinghe ghedooghde die stat
Van Lovene den ghenen dat,
Die al daer ghevanghe laghen,
Dat haer vriende ende maghen
Bi hem quamen, verstaet den fijn,
Spreken, eten ende vrolijc sijn.
Dus toghen die selke daer naer
Metten ghevanghenen eten daer,
Daer si van alderhande zaken
Tsamen vercalden ende spraken;
Ende eneghe van dien, soe wijt vernamen,
Als si weder te Bruessele quamen,
Sayden si onder tvolc aldaer
Dat die ghevanghene noch daer naer,
Soe si seiden, in corten termine
Noch hoopten los ende vri te sine.
Voort seiden si dat Eduwaert
De Hertoghe ende Jan Scockaert
Hem hadden vermeten int openbaer
Die ghene te dankene die hem aldaer
Hadden bracht in selken last.
Als dus die niemare breide vast
Onder tfolc te Bruessele meer ende men,
Liepen si weder te wapenen,
Ende begheerden met grooten gherochte
Dat men die ghevanghene weder brochte
Te Bruessele, om die sonder bliven
Allegader te doene ontliven.
Als dit den baenrotsen wert bekant
Ende den steden van Brabant,
Daer die ghevanghene ghelevert waren,
Ende si dat weigherden, hoordic verclaren,
Segghende dat niet en soude behooren,
Ghemerct dat si daer te voren
Eens bi den staten vore ghelesen
Hadden gheoordeelt ghewesen:
Doen repliceerde met desen weghen
Die ghemeente van Bruessele daer ieghen,
Segghende dat si niet en waren
Gheoordeelt vorder, hoordic verclaren,
Dan van den faiten, des seker sijt,
Die men wiste te diere tijt;
Ende want men daer na blikelijc
In den bezueke claerlijc
Bevonden hadde tverbont mesmaect
Twelke dat si hadden ghemaect
Metten heere van Assche heimelijc
Ende metten sinen, ende desghelijc
Meer ander poenten, die men te voren
Niet en wiste na recht behooren:
Soude men se uutrechten na tmespleghen.
Ende als si met desen weghen
Die baenrotsen niet beweghen en conden
Noch die steden, dat si tien stonden
Die ghevanghene leverden min no meere,
Wert die ghemeinte vergramt zeere,
Ende wouden sonder enich sparen
Den heere van Heinsberghe ende diere waren
Met hem ghevanghen, sonder swichten
Van den live op die merct doen richten;
Daer namaels den lande ghemeinlijc doe
Groote last af hadde moghen comen toe.
Om welken last, hoort mi ghewaghen,
Te verhuedene, waert overdraghen
Dat die baenrotse ende die stede
Die ghevanghene, daer ic af sede,
Allegader sonder verhouden
Te Bruessele weder leveren souden.
Na dit voorseide overdrach
Sijn si op eenen saterdach
Sevene in junio, wilt vezinnen,
Alle bracht te Bruessele binnen;
Der welker was, alst es gheruert,
XIIII, de welke worden ghevuert
In der stat huus in corter stont,
Daer alle die ghemeinte stont
Opter merct ghewapent claer.
Die ghevanghene sijn aldaer
Alle bracht, doe ic ghewach,
Opten voorseiden saterdach
In presentien, hout u daer an,
Jans van Diedeghem, als amman,
Ende, in presentien, dat ghijt wet,
Van den scepenen ende van der wet,
Ende van der ghemeinten die daer stont,
Van der heerlicheiden weghen, doe ic u cont,
Van den live gherecht sonder verlaet
Die X van hen, dat ghijt verstaet,
Als heer Jan van Coudenberghe, hoort die dinc,
Riddere, ende Heinric Cluetinc,
Willem van Assche onghespaert,
Heinric de Hertoghe ende Eduwaert,
Dien men de Hertoghe hiet desghelijc;
Wouter Pipenpoy ende Diederijc
De Loose, dat si u vercleert,
Willem van Mons, ende Jan de Weert,
Ende Jan Scockaert daer na sciere;
Ende na der noenen dander viere,
Als Jan ende Willem Cluetinc
Ende Jan de Leeuw, verstaet die dinc,
Ende Jan Tseraernts, doe ic ghewach.
Des sondaeghs, opten achtsten dach
Der maent van junio vore verclaert,
Troude van den Zype Gheeraert,
Die bi den greve groot regement
Van Saint Pol hadde ende bewent,
Joffrouwe Johannen teenre bruut
Van den Bisdomme, ende overluut
Voerde hi die bruut, en lieghe u niet,
Van haren huse, dits waer bediet,
Al over die merct - daer noch lach tsant
Met harer maghen bloede berant,
Die van des daeghs daer te voren
Ghericht waren, als ghi mocht hooren -
Tot in shertoghen hof onghespaert,
Daer die brulocht ghehouden waert.
Na allen desen, hout u daer an,
Confirmeerde hertoghe Jan
Van Brabant, die heere vercoren,
Die privilegie die daer te voren
Sijn brueder van Saint Pol, onthout dat,
Van Bruessele hadde verleent der stat,
Van den bourgemeesterscape, si u becant,
Ende ooc van den lieutenant
Met allen den poeten meer no min
Soe die privilegien houden in.
Voort confirmeerde hi, sijts vroeder,
Truwaertscap, dat die selve sijn broeder
Ghedraghen hadde, meer ende min,
Ende alle tghene dat hi daer in
Voort hadde ghekeert ende volbracht;
Ende hielt dat van alselker macht
Ende van selker weerden, wilt verstaen,
Als oft hijt selve hadde ghedaen,
Ende als oft bi sinen consente ende wille
Ghesciet ware beide lude ende stille.
Met meer poenten, verstaet den sen,
In der voorseider confirmatien
Volcomelijc begrepen ende bescreven,
Die te Bruessele waren ghegheven
XV in julio, hoorter naer,
XIIII^c XXI Ons Heeren iaer.