Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CV.

Vanden stedehouder des ammans van Bruesele ende vanden scepenen aldaer op Sinte Jans avont te makene.

Des saterdaeghs, doe ic u verclaer,
Seventiene in meie int selve iaer,
Tooch hertoghe Jan tot Mechelen
Bi den hertoghe van Bourgognen
Sinen neve; daer bi hem quam
Die bisscop van Ludeke, soe ic vernam,
Om te tracteerne van sinen vader,
Den heere van Heinsberghe, ende ooc te gader
Den anderen die te Bruessele waren
Met hem ghevanghen, hoordic verclaren;
Maer daer en waert ghesloten twint.
Soe es die dachvaert daer gheint,
Entie heeren scieden, doe ic ghewach,
In meie den XXIIII^sten dach.
Ende opten lesten dach daer naer
Der selver maent, dat weet voor waer,
Gaf ende verleende, si u verclaert,
Die greve van Saint Pol als rewaert
Des lants van Brabant, verstaet dat,
Dat in Bruessele der goeder stat
Van shertoghen weghen sal sijn voortan
Gheset een goet notabel man
Stedehouwer te wesen daer
Des ammans van Bruessele, dats waer;
Ende ooc, oft ghebeurde daer nare
Dat die hertoghe ghebreclijc ware
Die scepenen van Bruessele, si u cont,
Op Sinte Jans Baptisten avont
Voor der noenen, hout u daer an,
Over te sendene: dat als dan
Die scepenen, die af souden gaen,
Uten cose die was ghedaen,
Die den hertoghe over was ghesonden,
Souden moeten kiesen ter selven stonden
Seven nuwe scepenen onghespaert
(Met meer poenten daer toe verclaert
Die in den brieven begrepen sijn);
[Die] namaels in corten termijn
Bi den hertoghe onghefraudeert
Volcomelijc [souden werden] gheconfirmeert.