Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CIV.

Hoe die hertoge bekende dat syn brueder te rechte Rewaert van Brabant ghemaect ware ende confirmeerde al dat hy inden rewaertscape ghedaen hadde.

Int selve voorseide Ons Heeren iaer
Vier daghe in meie, hout dit voor waer,
Verleende hertoghe Jan ende gaf
Sijn open bezeghelden brieve daer af,
Inhoudende ter substancien claer
Tghene dat bescreven volght hier naer,
Te wetene: want hi voormaels tbewent
Bevolen hadde ende tregement
Sijns selfs, sijns staets, si u bekant,
Ende sijns lants van Brabant
Eneghe[n] daer hi in hoopte zeere,
Dat aenghesien souden hebben die eere,
Oorbore, profijt, welvaert ghemeine
Van sinen lande groot ende cleine,
Daer si toe waren ghebonden met eeden;
Twelke si alsoe niet en deden,
Maer hadden hem in contrarien
In haren eeden ende officien
Van den rechten, charteren, si u bekant,
Ende privilegien van Brabant
Ghehouden, ghedreghen lude ende stille:
Soe dat si om harer mesdaet wille
In der stat van Lovene met enicheden
Der edelre ende der goeder steden
Openbaerlijc worden ghecorrigeert;
Ende dat si ooc, si u vercleert,
Met slinker informacien, alst scijnt,
Te vervreemdene hem hadden ghepijnt
Van siere ghesellinnen in allen keere
Der hertoghinnen, ende voort meere
Van sinen brueder, hoort mi ghewaghen,
Ende andren sinen vrienden ende maghen,
Ende van sinen lande in alder mate.
Mids den welken die drie state
Van sinen lande van Brabant voorseit
Beduchten, dat meer nuwicheit
Ende groote swaer laste uutghenomen
In den lande hadde moghen comen;
Soe dat si, om die ernstelike
Te verhuedene ende behoorlike
Remedie te vindene in goeder mate,
Ende tot enen princeliken state
Hem weder te bringhene, ghelijc als si
Na haren rechten, dat segghic di,
Ende herbrenghene wel mochten volbringhen;
Ordineerden mids desen dinghen,
Setten ende maecten, si u verclaert,
Sinen lieven brueder tot enen ruwaert,
Philips van Brabant, ende behoeder.
In welker ruwaertscap sijn lieve broeder
Hem hadde ghedraghen soe bruedelijc
Soe vriendelijc ende soe ghetrouwelijc,
Dat hijs wel van hem, sijt seker das,
Ende van sinen lande te vreden was.
Soe confirmeerde, ratificeerde
Die hertoghe ende approbeerde
Tvoorseide ruwaertscap meer ende min,
Ende tghene dat sijn lieve brueder daer in
Voort hadde ghekeert, dit wilt verstaen,
Oft in enegher wise ghedaen
Bi consente der edelre, si u bekant,
Ende der steden sijns lants van Brabant,
Het ware van justicie, oft ooc mede
Weder van live of van lede,
Van rechteren ende officieren,
Scepenen, wethouweren eneghertieren
Ende anderen dieneren, wilt verstaen,
Beide af te settene, ende ooc aen
Alle correctien ende vergaderinghen,
Hanteringhen ende handelinghen
Die in den ruwaertscape, dit wilt hooren,
Bi den meesten deele daer te voren
Der edelre, der steden, hoort mi verclaren,
Sijns lants van Brabant ghesciet waren.
Voort, oft in toecomenden termine
Ghebuerde, dat hi oft die sine
Nacomelinghen, hertoghen bekant,
Oft hertoghinnen van Brabant,
Den drien staten sijns lants, sijts wijs
Oft eneghen van hen in enegher wijs
In haren rechten vercortinghe dede,
In charteren oft in privilegien mede,
In costumen, usagien energhertieren,
Ende herbringhen in gheenre manieren,
Violentie, cracht, macht of wille,
Ende hem namaels lude of stille
In der manieren als voorseit es
Oft in gheliker, sijts ghewes,
Meer van hen vervreemde daer naer:
Soe consenteerde hi daer
Voor hem ende sijn nacomelinghen,
Dat si hem in gheenen dinghen
In haefliken dienste en selen na desen
Onderdanich noch ghehoorsam wesen.
Dat dan die drie staten, hoort den sen,
Metten meesten ghevolghe van hen
Souden moghen kiesen onghespaert
Int lant van Brabant eenen rewaert,
Die volcomen macht min no meere
Hebben soude als prince ende heere
Des lants van Brabant meer ende men:
Met vele meer poenten ende clauselen
In sinen openen brieven bescreven,
Die te Lovene waren ghegheven
Vier daghe in meie, dat es waer,
XIIII^c XXI Ons Heeren iaer.