Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CII.

Hoe die proofst van Coudenberge ghevanghen, her Everaert Tserclaes riddere, Geldolf van Coudenberghe ende Willen Pypenpoy ghericht worden.

Binnen desen selven tiden
Die wi hier dus overliden,
Wert te Bruessele sonder verlaten
Ghevanghen heer Gheert van der Straten
Proofst van den regulieren, dits waer,
Op Coudenberch. Bi hem daer naer,
Als hi aldus ghevanghen sat,
Vernam men ierst ende wiste dat
Van den gheselscap heimelijc,
Die de heere van Assche ende desghelijc
Meer andere hadden, wilt mi hooren,
Tsamen ghemaect ende ghesworen
Ende verbrieft, soe ghi hier voort
Claerliken wel hebt ghehoort.
Ende als men wiste die ware oorconde
Dat selke heimelike verbonde
Ende vrientscapen ghevesticht waren:
Soe heeft men, nu hoort mi verclaren,
In die Passieweke, dats waer,
Voor Palmsondach, ende daer naer
In die Goedeweke, doe ic ghewach,
Vore den Heileghen Paeschdach,
Die persone die van Bruessele twaren
Te Lovene, tAntwerpen ghevoert waren
In der ghevanghenessen, ende elswaer,
Op die slote hier ende daer,
Besocht, gheaerbeit, dat segghic di,
Swaerlijc ghepijnt, soe dat si
Ende elc van hen bekinden daer
Ende verliden. Dat hebben daer naer
Die raedsliede van Bruessele, die al doe
Waren ghedeputeert daer toe,
Thuus ghebracht, ende daer na zaen
Volcomen relacie daer af ghedaen.
Met welker relacien, si u verclaert,
Die ghemeinte zeere vergrimt waert
Ende weder beruert als wilen eere.
Soe dat int iaer van Onsen Heere
XIIII^c XXI, doe ic ghewach,
Opten Belokenen Paeschdach,
Den XXX^sten dach, met grooten gheveerte,
Der voorseider maent van meerte,
Die ghemeinte van Bruessele zeere ghesterct
Ghewapent vergaderde op die merct;
Daer si al tsamen ligghende bleven.
Als men drie daghe sach ghescreven
In aprille, opten donderdach,
Gheerde van den Zype men comen sach
Ter merct, die hadde groote macht
Bi den greve van Saint Pol, ende gheacht
Was hi zeere met hem aldoe.
Hi sprac dus der ghemeinten toe:
‘Kindere, sijt goets moets. Ic doe u cont,
Men sal rechten nu ter stont.’
Seere cort daer na worden bracht aldaer
Ende metten sweerde gherecht daer naer
Vore der stat huus, sijt seker das,
Heer Everaert tSerclaeus, die ridder was,
Gheldolf van Coudenberghe, dit vernem,
Ende Willem Pipenpoy met hem;
Ende des anderdaeghs daer naer
Toghen die heeren beide van daer,
Die hertoghe ende die greve sijn broeder,
Ten steecspele, des sijt vroeder,
Bi den hertoghe van Bourgognien
Haren neve te Brugghe, verstaet den sen.
Des sondaeghs quamen si, si u becant,
XIII in aprille, in Brabant.
Die hertoghe tooch te Lovene binnen,
Die greve te Bruessele, wilt versinnen;
Daer bleef hi tot sdijnsdaeghs. Doe trac hi
Bi sinen brueder, segghic di;
Des donderdaeghs daer na, wilt versinnen,
Quam hi weder te Bruessele binnen.
Des vridaeghs tooch hi, doe ic ghewach,
In aprille den achtienden dach,
Te Risele, ten steecspele ter Spinetten,
Bi den voorseiden hertoghe, sonder letten,
Sinen neve van Bourgognien,
Daer si solaesten onder hen.