Brabantsche yeesten. Les gestes des ducs-de-Brabant par Jean de Klerk d'Anvers (3 delen)

CI.

Hoe de hertoghe van Leuvene tot Bruesele ende van daer tot Antwerpen ende namaels in Henegouwe trac, ende weder te Bruesele quam ende hoe de hertoghinne trac in Jnghelant.

Des sondaeghs daer na vielt alsoe,
XVI in februario,
Tooch die greve van Saint Pol, sijts vroeder,
Bi den hertoghe sinen broeder
Te Lovene; des anderdaeghs na dat
Quamen si te Bruessele int stat.
Daer bleef die hertoghe, verstaet tgheveerte,
Tot opten iersten dach van meerte.
Doen trac hi tAntwerpen ter dachvaert
Die al daer ghehouden waert
Metten ghedeputeerden, si u bekant,
Sijnre lande Hollant ende Zeelant.
Opten V^en dach daer na, wilt verzinnen,
Quam hi weder te Bruessele binnen,
Daer hi omtrint tien daghe bleef.
Des vridaeghs, als men VII screef
Der maent van meerte, dat elc verzinne,
Tooch Vrou Jacoba die hertoghinne
Sonder shertoghen oorlof onghespaert
Uut Henegouwe tInghelant waert;
Daer af dat namaels, eert quam int fijn,
Vele grooter plaghen comen sijn.
Hier na, doe ic u ghewach,
Des sondaeghs, in meerte den IX^sten dach,
Quam die hertoghe van Bourgognen
Te Bruessele ghereden, verstaet den sen,
Daer hi tot sdonderdaeghs es bleven.
Daerenbinnen wasser groote feeste bedreven
Van stekene met speren sonder wanc
Ende anders, gheduerende drie daghe lanc.
Des saterdaeghs, hout u daer an,
XV in meerte, tooch hertoghe Jan
Van Brabant, elc wel dit onthouwe,
In sijn lant van Henegouwe
Ende daer bleef hi, doe ic ghewach,
Tot opten sesentwintechsten dach
Der selver maent, wilt dit versinnen;
Doen quam hi weder te Bruessele binnen.
Daer bleef hi, dat en es gheen zaghe,
Tot des goensdaeghs in die Paeschdaghe,
Ende aldus moeten wi hier int clare
Tghetal veranderen van den iare.