Brabantsche yeesten. Les gestes des ducs-de-Brabant par Jean de Klerk d'Anvers (3 delen)

C.

Hoe die stat van Bruesele voortane byden VJJ gheslechten ende JX natien sal werden gheregeert.

In den rade, daer af dat ondersceet
Int voorseide cappittel ghescreven steet,
Wort ooc ghesloten ende overdraghen
Dat men voortane teeweghen daghen
Alle dambachten van Bruessele, dit onthoude,
Trecken ende restringeren soude
In IX natien, ende dat
Voortane die voorseide stat
Bi den seven gheslachten, hoort den sen,
Ende bi den neghen natien
Soude worden altijt gheregeert,
In der manieren hier na vercleert:
Te wetene, dat men, dit onthoude,
Alle iare tSinte Jansmesse maken soude
Seven scepenen ende rentmeesters twee
Uten VII gheslechten ende niet mee,
Soe men van ouds hadde gheploghen,
Ende dat men voort, dits ongheloghen,
Uten gheslechten, daer wi af spraken,
Eenen burghemeester soude maken,
Ende enen burghemeester, soe ic bediede,
Twee rentmeesters ende sesse raetsliede
Uten neghen nacien; ende bi desen
Neghentien personen soude wesen,
Na dondersceet, verstaet den sen,
Van ieghelijcs officien,
Die stat voortane gheregeert.
Alle die zaken vore vercleert
Met meer anderen poenten, dits waer,
Verleende ende gaf aldaer
Die greve van Saint Pol als ruwaert
Des lants van Brabant, die hi ter vaert
Der stat met sinen openen brieven
Bezeghelde met grooter lieven,
Die ghemaect waren in Ons Heeren iaer
Viertien hondert XX, dits waer,
XI in sporkille, soe wi lesen.
Terstont achtervolghende desen
Worden Gheert Pipenpoy, uten gheslechten;
Ende Jacop Stovaert, hoordic berechten,
Uten natien ghenoemt hier voren,
Twee burghemeestren ghecoren;
Voort uten nacien, soe ict bediede,
Twee rentmeesters ende VI raetsliede
Worden ooc ghemaect, doe ic ghewach,
Opten selven voorseiden dach.