Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XCIII.

Vanden dachvaerden ende tractaten tusschen den hertoge ter Eenre ende den Rewaert sinen brueder ter ander syde.

Int selve iaer van XX, dat segghic di,
Des sondaeghs XXIIII in novembri,
Als hertoghe Jan van Brabant
Te Tricht was, si u bekant,
Quamen Mijn Vrouwe die hertoghinne
Ende haer moeder te Bruessele inne;
Die greve van Saint Pol quam met hen,
Ende die drie state, verstaet den sen,
Des lants van Brabant, dat elc versta.
Ende des anderdaeghs daer na
Opter goeder S^t Kathrinen dach
Hielden si die dachvaert, doe ic ghewach,
Te Coudenberghe int hof, dats waer;
Ende des dijnsdaeghs daer naer,
Op der stat huus van Bruessele, mi hoort,
Wert die greve van Saint Pol rechtvoort
Int ruwaertscap gheconfirmeert.
Ende daer maecte hi onghecesseert
Willeme van Montenaken tehant
Sinen drossate van Brabant -
Dese voorseide Willem die was
Heere te Grasen ende te Wildere, sijt seker das -
Ende hi ontsette wel gheringhe
Wilen Everaerts sone Janne Cluetinghe;
Ende Janne van Diedeghen in sijn stat
Maecti amman te Bruessele int stat,
Ende sinen eet hi daer af dede
VII in december te Bruessele int stede.
Des goensdaeghs, dat segghic di,
Sevenentwintich in novembri,
Heeft Mijn Vrouwe die hertoghinne,
Die greve van Saint Pol, dit versinne,
Die drie state van Brabant meer no min
Ende een ieghelijc bezunder van hen,
Met haren brieven, dat es waer,
Van gheloove ghemechticht daer
Dabte van Sinte Machiels alsoe
Perke, Heelesem, Tongherloe,
Den proost van S^t Gheertruden mede,
Om te treckene te Tricht int stede
Bi den hertoghe haren heere,
Met hem te tracteerne, te biddene zeere,
Dat sijnre ghenaden ghelieven woude
Ende hi in Brabant comen soude.
Welke prelate te Tricht wel zeere
Van den hertoghe haren heere
Guetelijc ghehoort, verstaet den fijn,
Ende vriendelijc ontfanghen sijn,
Ende verworven aen den hertoghe houde,
Dat hi tot Diest comen soude,
Om volcomeliker te hoorne claer
Die ghene die de staten aldaer
Sijns lants van Brabant, hoordic ontbinden,
Bi hem aldaer souden sinden.
Des goensdaeghs opten IIII^den dach
Naest comende, die in december lach,
(Ende) die hertoghe gaf in alder maten
Den ghedeputeerden der drie staten
Toten ghetale van LX persoonen doe,
Ende alsoe vele perde daer toe,
Goet vast gheleide, na haer begheeren
Te comene, te blivene ende te keeren.
Tot welken daghe, als ic vernam,
In der stat van Diest die hertoghe quam;
Ende worden bi hem ghesonden
Van sijns brueders weghen tien stonden
Van Saint Pol, si u bekant,
Ende der drie state van Brabant,
Die abdte die ic vore nuemde, alsoe
Sinte Machiels, Perke ende Tongherloe,
Ende die ghedeputeerde mede
Van Bruessele ende Antwerpen der stede,
Die hem alle baden samentlijc
Met herten, zeere oetmoedelijc,
Dat hem ghelieven woude, nu hoort,
In sinen lande te comene voort,
In enich siere steden, verstaet den sen,
Van Bruessele oft van Antwerpen.
Daer toe die ghedeputeerde meere
Van Antwerpen seiden tot haren heere:
‘Gheliefde hem daer na sijn ghevoech
Te comene, ende en waren niet wijt ghenoech
Die poorten: si souden trouweleken
Die muere der stat in stucken breken.’
Welker beden, hout u daer an,
Niet wederstaende, es hertoghe Jan
Van Diest ghetoghen, wilt versinnen,
Ende tooch tsHertoghenbossche binnen.
Maer eer men sciet, hebbic vernomen,
Waren die prelate overcomen
Ende die ghedeputeerde der stede
Bruessele ende Antwerpen mede,
Metten hertoghe, si u verclaert,
Van eener ander dachvaert,
Die men hielt cort na dat,
XVI in december in der selver stat.
Van sHertoghen weghen quamen tier uren
Die greve van Moers, Jan van Bueren
Proost van Aken, si u bekant,
Doen tresorier van Brabant,
Ende heer Willem van Ghent met hen.
Van des greven weghen meer no men
Van Saint Pol waren daer tien stonden
Wesemale ende Montjouwe ghesonden
Met meer andere; maer daer en waert
Niet ghesloten ter dier dachvaert.
Die prelate hebben noch sonder beide
Met harer beden ende aerbeide
Een dachvaert verworven, sijt seker das,
Die tot Eindoven ghehouden was
Sestien daghe in januario,
Ende op die daghe volghende also.
Tot welker dachvaert die hertoghe sant
Den heere van Assche, Willeme van Ghant,
Heer Everaerde Tserclaes ende Janne van Aa.
Die greve van Saint Pol sant daer na
Die voorghenoemde in goeder trouwe
Wesemale ende Montjouwe;
Maer niet ghesloten en wert daer van.
Hier na soe porde hertoghe Jan
Van sHertoghenbossche sijnre stat,
Ende quam tot Diest, ic segghe u dat,
In januario den XX^sten dach;
Maer niet langhe hi daer en lach,
Als ic hier na, hebbics gheval,
Cortelinghe vertellen sal.