Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XCII.

Hoe die greve van Simpoul Rewaert van Brabant wert ghemaect ende van Hoesdyn ende Sinte Gheertrudenberghe.

Int Capittel hier vore gaf ic te kinnen
Hoe beide die Vrouwen die hertoghinnen,
Mijn Vrouwe van Brabant ende haer moeder,
Entie greve van Saint Pol, slants behoeder
Van Brabant, die edele ende steden
Tot Vilvoorden ter dachvaert reden,
Die gheordineert was aldaer
Ghehouden te wordene, weet voor waer,
In september den XXIX^sten dach,
Als ic u voren dede ghewach.
Ende als men vernam die waerheit das,
Dat die hertoghe wech ghereden was
Heimelijc uut Bruessele der stede:
Die baenrotse, edele, ende daer mede
Die steden die daer ter dachvaert quamen,
Worden eens ende ghedroeghen tsamen,
Dat si, bi rade ende wetentheit
Der ambassiatoers voorseit
Sconincs van Vrankerike verheven
Ende shertoghen van Bourgognen voorscreven,
Den greve van Saint Pol, doe ic ghewach,
Des dijnsdaeghs opten iersten dach
Der maent octobris onghespaert
Van Brabant coren teenen ruwaert;
Ende alsoe sijn, des sijt vroeder,
Mijn Vrouwe van Brabant ende haer moeder,
Entie greve van Saint Pol tehant
Metten edelen ende steden van Brabant
Van Vilvoorden gesceeden, hebbic vernomen,
Ende in der stat van Bruessele comen.
Sanderdaeghs waert overdraghen certein,
Dat men Sente Gheetrudenberghe ende Hoesdein
Weder crighen soude ende winnen.
Soe dat ten scrivene der hertoghinnen
Ende versueke, dat ghijt wet,
Haers brueders van Saint Pol met
Als ruwaert des lants, tehant
Die edele ende steden van Brabant
Met enen scoonen heere ghehent
Te Breda quamen ende daer omtrent
Des donderdaeghs den XVII^sten dach,
Die in die voorseide maent octobris ghelach.
Van daer tooch Mijn Vrouwe onghespaert
Ende van Saint Pol haer brueder die ruwaert,
Met hem die heere van Rotselaer,
Die ionker van Montjouwe daer naer,
Die ionker van Diest, Jan van Glimes, neemt goom,
Heere van Berghen opten Zoom,
Heinric van Rotselaer, een eerbaer man,
Ende van Schoonhoven die ionghe Jan,
Ende meer edele, verstaet den sen,
Ende hare liede van wapenen
Van Breda tot Hoesdein; ende daer
Worden si inne ghelaten, dits claer,
Tot slants behoef van Brabant.
Mijn Vrouwe die hertoghinne tehant
Werdt daer ontfanghen met groter minne
Ende ghehult als hertoghinne
Van Brabant, ende si beval daer naer
Arnde van Sevenberghen, dats waer,
Haren drossate ende kastelein
Des lants ende slote van Hoesdein,
Bi der trouwer hulde, wilt verstaen,
Die welke hi haer hadde ghedaen
Ende sculdich ware, dats certein,
Dat hi tstat ende slot van Hoesdein
Metten lande datter toe behoort,
In soude houden ende bewaren voort
Tot behoef, si u bekant,
Des voorseiden lants van Brabant;
Oft die overgheven sonder failgeeren
In den handen mijns voorscreven heeren
Van Saint Pol des greven ghemeit,
Tot behoef des lants voorseit:
Om daer omme, hoort mi scriven,
Vore alselken cost te bliven,
Als die greve van Saint Pol ende tlant,
Die baenrotse ende edele van Brabant
Ghedaen hadden in allen zinne
Om Hoesdein te nemene inne,
Te bezetten ende te bewaren,
Ende te belegghene, hoort mi verclaren,
Sinte Gheertrudenberghe, ende die si
Noch doen souden, dat segghic di.
Na desen als die hertoghinne
Entie greve van Saint Pol, dit versinne,
Ende die edele vore ghenant
Die stat van Hoesdein slot ende lant
Beset hadden ende wel bewaert
Met volke van wapenen, onghespaert
Des saterdaeghs scieden si van daer
Ende quamen des avonts daer naer
Int stat van Breda, dat segghic di,
Ende sondaeghs, twintich in octobri,
Es die greve van Saint Pol tehant
Metten edelen ende steden van Brabant,
Sonder alleene, ghelooves mi,
Tstat van den Bossche metter Meyerie,
Vore Sinte Gheertrudenberghe ghetoghen.
Die hebben si vaste ende vermoghen
Beleghen zeere mechtich al omtrent,
Sonder bevel, wille ende consent
Hertoghen Jans haers heeren, doe ic gewach,
Die tsHertoghenbossche noch al doe lach.
Het es claer te wetene, want
Hertoghe Jan van Brabant
Tregement der lande, als ic vore seide,
Van Hollant ende Zeelant beide
Over hadde ghegheven, des neemt goom,
Hertoghe Janne van Beieren sinen oom:
Soe hielt die stat, des seker sijt,
Van Sinte Gheertrudenberghe tier tijt,
Ghelijc als deden, si u bekant,
Die ander steden van Hollant,
Hertoghe Janne van Beieren
Voor haren ruwaert, verstaet den sen,
Ende waren in sijnre ghehoorsaemheiden.
Maer Diederijc van der Merweiden
Die welke was, dat weet certein,
Opt slot van den Berghe castelein,
Hielt met Mier Vrouwen der hertoghinnen
Van Brabant. Hi en woude in gheenen sinnen
Hertoghe Janne van Beieren vore verclaert
Hulden, noch houden voor ruwaert,
Noch hem gheensins ghehoorsam wesen.
Hertoghe Jan beval mids desen
Der stat, dat si in gheenen sinne
Provande ten slote liet vueren inne;
Ende om dat te bewarene bat
Leide hi volc van wapenen in die stat.
Als nu die castelein wert gheware
Dat die vitailgie hem viel contrare
Om tslot te houdene, socht hi tehant
Troost aen tlant van Brabant;
Die daer sijn comen met moghentheit,
Als ic u vore hebbe gheseit,
Om hem ende tvoorseide slot van dien
Te provanderene ende te versien.
Binnen dien tiden dat theer dus lach
Voor den Berghe alle den dach
Seide men voor zeker waer,
Dat hertoghe Jan van Beieren daer
Metten Hollanders met nide
Ende Zeelanders comen soude te stride,
Ende soude met hem bringhen tehant
Hertoghen Jans baniere van Brabant.
Ende mids dien, soe hielt men raet
Int heer van Brabant, oft die daet
Alsoe ghesciede als men dede verstaen,
Wat si daer ieghen wouden aengaen.
Daer op dat eneghe seiden sciere
Dat si ieghen haers heeren baniere
In gheender manieren striden en wouden.
Die ander seiden dat si souden
Jeghen die ghene striden met machten
Die tonrecht haers heeren baniere brachten
Te velde, om die, si u bekant,
Te crighene uter onrechter hant,
Ende weerdichlijc, verstaet die woorde,
Weder te bringhene daer si behoorde.
Theer van Brabant, dats gheen zaghe,
Lach aldaer omtrint X daghe
Voor Sinte Gheertrudenberghe al bi,
Binnen welken tide dat si
Tslot hebben gheprovandeert met gheere
Van vitalien ende van gheweere,
Ende ooc van alderhande enghien,
Des hem behoefde, wel versien.
Dat en consten haer viande niet
Beletten. Daer na, verstaet tbediet,
Des dijnsdaeghs, den XXIX^sten dach
Die in die selve maent octobris lach,
Es theer van Brabant ongheloghen
Opghebroken, ende van daer ghetoghen
In Brabant, doe ic u ghewach.
Daer na op Sinte Mertens dach,
XI daghe in novembri,
Scoot uten slote met moede vri
Diederijc van der Merweide
Tfier in de stat, dat, te haren leide,
Die stat ende kerke collegiael
Te gronde verbrande altemael,
Vernielde ende verdorf, te verwite
Hertoghe Janne van Beieren ende te spite
Der stat van Dordrecht, hoort mi lien,
Ende al harer mede partien.
Om dat Diederijc van der Merweiden
Tslot dus hielt met manlicheiden,
Ende dus truwelijc heeft verwaert,
Soe gaf hem namaels, si u verclaert,
Tlant van Brabant, om hem te loonen,
Tsinen cost sestien dusent croonen
Des conincs munte van Vrankerijc.
Aernt van Sevenberghen desghelijc
Heeft tslot van Huesdein entie stat
Truwelijc bewaert; daer af dat
Men u noch meer sal segghen voort
Hier na, ter plaetsen daert behoort.