Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XCI.

Hoe hertoge Jan van Bruesele schiet ende waer hy toech tot dat hy te Tricht quam.

Als die grave van Saint Pol, sijts ghewes,
In Brabant uut Vrankerijc comen es,
Heeft hi hertoghe Janne onghecesseert
Sinen brueder te Bruessele ghevisenteert.
Daer na trac hi herde saen
Te Lovene, ende heeft soe vele ghedaen,
Dat Mijn Vrouwe die hertoghinne
Ende haer moeder quamen te Lovene inne
Uut Henegouwe; ende desghelike
Soe hebben die coninc van Vrankerike
Entie hertoghe van Bourgognen tien stonden
In Brabant haer ambassiateurs ghesonden;
Die welke ernstelijc ende zeere
Ende van Saint Pol mijn voorseide heere
Vele spraken hielden sonder vermiden
Metten hertoghe ter eender siden,
Ende ter ander siden, sijts vroeder,
Met Mier Vrouwen ende harer moeder
Ende metten baenrotsen ende edelen
Die te Lovene laghen, verstaet den sen.
Soe dat ten utersten waert gheordineert,
Bi middele mijns heeren vore vercleert
Van Saint Pol ende der ambassiatore
Die ic ghenuemt hebbe hier vore,
Een dachvaert, die soude ghehouden wesen
In der stat van Vilvoorden, soe wi lesen,
Bi den hertoghe ende der hertoghinnen
Ende den edelen, om daer binnen
In der herberghen te sine, dat segghic di,
Des sondaeghs XXIX in septembri.
Tot welken daghe, dit versinne,
Quam Mijn Vrouwe die hertoghinne
Ende haer moeder entie edele mede
Ghereden van Lovene uter stede;
Entie greve van Saint Pol, soe wi hoorden,
Quam van Bruessele te Vilvoorden.
Maer hertoghe Jan, dits waer bediet,
En quam tot diere dachvaert niet.
Maer des anders daeghs, doe ic ghewach,
Des maendaeghs, opten lesten dach
Van september, hoort mi rueren,
Des avonts, omtrint der sester uren,
Es hi sonder enich beiden
Van Bruessele heimelijc ghesceiden.
Ende men gaf te verstane aldare
Dat hi ziec ende onlustich ware,
Ende datti mids dien, verstaet dit wel,
Bi hem hebben en woude niement el
Dan heer Everaerde Tserclaes ende twee of drie
Sinen camerknechten, de welke die
Die spise droeghen int openbare
In sijn camere, recht oft hi daer ware.
Maer neen, hi niet; hi was wech, ende met hem
Jan van Aa ende sijn sone Costen
Ende noch meer andere, in lieghe u niet,
Als Gheerlec, dien men van Ghemert hiet,
Robbrecht van Assche, Diederic de Loose.
Ende dese leiden, seeght die gloose,
Den hertoghe Janne onder hen
Des nachts al buten Mechelen
Over die brugghe te Musene, doe ic ghewach.
Des dijnsdaeghs, opten iersten dach
Der maent octobris, quamen si
Op tslot te Ghermel, dat segghic di,
Dat den heere van Hooghstraten toe behoorde,
Ende van daer trac voort, met corten woorde,
Die hertoghe des anders daeghs daer naer
Bi den Bossche tot Herlaer;
Ende daer quamen bi hem cort na tgone
Die heere van Assche ende Jan sijn sone,
Bernt Utenenghe, dat elc versta,
Rutgheer Boene; ende daer na
Trac hertoghe Jan altehant
Op dat huus te Nuwelant,
Dat Gheerlec van Ghemert hoorde toe;
TsHertoghenbossche trac hi doe.
Daer bleef hi ligghende, hoort na mi,
Toten achtsten daghe van novembri.
Binnen welken tide hi eens trac, dits waer,
Tot Buchoven; ende bi hem waren daer
Die ioncheere[n] van Cleve ende van Gaesbeke,
Ende die heere van Assche zekerleke
Ende die sine; ende na dat
Trac hi weder ten Bossche int stat.
Namaels trac weder, si u bekant,
Die hertoghe, tot Nuwelant,
Ende van daer tot Hees, daer bi hem quam
Die ionker van Cleve, als ic vernam,
Die heere van Heinsberghe, die proofst van Aken,
Entie heere van Assche, verstaet die zaken,
Metten sinen, ende hielden aldaer
Tsamen heimeliken raet, dats waer.
Die hertoghe Jan quam weder na dat
TsHertoghenbossche, in sijnre stat.
Te Nuwelant tooch hi weder daer naer.
Die jonker van Gaesbeke quam bi hem daer,
Die heere van Assche ende dander met.
Van Nuwelant tooch hi onghelet
Toten dorpe dat Duere heet bi namen;
Daer in den velde bi hem quamen
Die heere van Heinsberghe, dits waerhede,
Die heere van Assche ende dander mede,
Houdende daer, dat ghijt verstaet,
Haren heimeliken raet.
Die hertoghe tooch weder omme, van daer,
Tot sHertoghenbossche; ende naer
Allen desen es die hertoghe Jan
Des vridaeghs gheporret van dan,
Achte in november, dat si u cont,
Ende es ghetoghen tot Helmont,
Ende alsoe voort trac hi te richt
In sijnre stat van Maestricht;
Daer bleef hi ligghende, des seker sijt.
Nu willen wi hem te deser tijt
Laten, ende willen u bedieden
Die zaken die binnen dier tijt ghescieden
In Brabant, sint dat, als boven steet,
Die hertoghe heimelijc uut Bruessele reet.