Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXXXIX.

Vanden andren raetslieden die den hertoghe Jan van Brabant maecte ende onthielt.

Als die heere van Assche dus vore vercleert
Ende dander waren ghecorrigeert,
Heeft hertoghe Jan van Brabant
Sinen staet ghemuteert tehant
Ende verandert, wilt mi hooren,
Ende tot sinen rade ghecoren
Ende regemente, verstaet den sen,
Minen heere den abt van Hafflighem,
Ende heere Janne van Cuyck, sijts wijs,
Heere van Hooghstraten, ende heer Cornielijs
Van Liedekerken die te Lens was heere;
Diederiken van Meerhem, dits ware leere,
Die tier tijt heere van Boxstel was;
Heere Reinere van Berghen, sijt seker das,
Heere te Goele ende te Mertsena;
Van Cortenberghe meester Amant daer na,
Doctor in der godheit ende deken
TSinte Donaes te Brugghe, hoort mi spreken;
Heer Willeme van Ghent tot Meerwijck heere,
Heere Everaerde Tserclaeus ende voort meere
Claeuse van den Werve, aldus hoordic,
Ende van Gheemert Gheerlic.
Welken tienen oft den sessen van hen
Gaf hertoghe Jan, verstaet den sen,
Alselken macht als hi, dat wet,
Den heere van Assche ende den anderen met
Voortijts hadde ghegheven met lieven,
Ghelijc alst blijct bi den brieven
Van harer commissien, die ghegheven
Waren te Bruessele ende ghescreven
Int selve iaer twintich, segghic di,
Elf daghe in septembri.