Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXXXVIII.

Hoe Jan Cluytinck Everaerts sone amman te Bruesele waert ende waertoe hy hem verbant.

Hier na, te wetene, dat segghic di,
Twee daghe in septembri,
Ontsette die hertoghe te dier tijt
Janne Taye van Eelwijt,
Ende maecte amman, dits ware dinc,
Te Bruessele Janne Cluetinc
Sone wilen Everaerts, hout u daer an,
Cluetinc; ende die selve Jan
Heeft des anderdaeghs ghegheven
Sijn open beseghelde brieve bescreven,
Die in der substancien, sijts ghewes,
Begrepen, dat hier na volghende es:
‘Want Mijn lieve ghenedeghe Heere,
Die (hertoghe) heeft een wijl tijts zeere -
Uut informatien der gheenre twaren
Die mijn vriende niet en waren
Noch ooc ter tijt en sijn tot desen -
Op mi vertorent ende gram ghewesen,
Nu heeft ghelieft mi, sonder waen,
Tsier gunsten ende vrientscap [t]ontfaen,
Ende mi nu, verstaet die zaken,
Sinen amman van Bruessele te maken:
Soe eest dat ic, verstaet die dinc,
Jan, gheheeten Cluetinc,
Everaerts Cluetincs sone, dits waer,
Eenen iegheliken doe te wetene claer
Dat ic, boven den eet die[n] ic saen
Van den ammanscape hebbe ghedaen,
Minen Heere hebbe ghelooft met lieve
Ende ghelove mits desen brieve
Bi trouwen mijnre kerstenheiden,
Eeren ende sekerheiden,
Met opgherechten vingheren ghereede
Ende met ghestaefden eede
Lijflijc ten Heileghen (hebbe) gheswooren,
Dat ic hem ende die daer toe hooren,
Minen lieven heeren maghen ende vrienden,
Die mi ter gunsten ende vrientscap dienden
Van minen lieven ghenedeghen Heere,
Hebben gheholpen ende ghevordert zeere,
Als van Grimberghen heere heer Jan
Heere van Assche, ende voort an
Jan van Assche sijn sone, met gheere,
Bernt Utenenghe ende Reinere
Moers, sijn raetsliede vercoren,
Ende Rutgheer van Tefelen, wilt mi hooren,
Gheheeten Boene, sijn secretarijs,
Ende voort allen anderen in alderwijs
Dieneren ende vrienden min ende meere
Van minen voorseiden ghenedegen Heere,
Die hi verantwerden wilt sonder si
Met ondersceide, ende die hi
Ghevoordert wilt hebben over al,
Mijn leefdaghe bliven ende wesen sal
Goet ende ghetrouwe in allen keere,
Ende minen voorseiden ghenedeghen Heere
Onderdanich, ghehoorsam sijn ende ghereet
In allen zaken ende, daer ict weet,
Sijn recht ende heerlicheit openbare
Helpen houden ieghen wien dat ware,
Ende met live, met goede tot alle desen
Verantwerden alst te doene sal wesen;
Ende dat ic hem ende minen, si u bekant,
Heeren maghen, vrienden vore ghenant
Ende allen den ghenen groot ende smal
Daers mijn heere vore begheeren sal,
Haer archste[sal] waernen, daer ict weet,
Haer vrome, haer beste voorderen ghereet
Ende verwerven na alle mijn macht,
Ende lijf ende goet ende alle mijn cracht
In allen stucken truwelijc sonder letten
Ende ongheveinst bi hem setten,
Ende hem doen ende bewisen in alder mate
Al dat een goet ondersate
Ende ghetrouwe dienere in allen keere
Ende vrient mach sinen rechten heere,
Maghen ende vrienden, sijts ghewes,
Ende van eetsweghen sculdich te doene es,
Met woorden, met werken, als man van eeren,
Sonder enich simuleeren;
Ende dat ic mi van nu voort an
Ghijsbrechts Pypenpoy ende heer Jan
De(n) hertoghe, daer ic vore af telde,
Noch die ooc van den Heetvelde
Nemmermeer harer gheen van al
Aendraghen noch onderwinden en sal,
Noch ooc engheenen van hen
Enegherande dienst meer no men,
Vrientscap, liefde, gunst ocht minne
Doen noch bewisen in gheenen sinne;
Den welken ic op trouwe vore ende na
Eere ende eet te male af ga
Ende af wesen wille voort meere;
Het en ware dat Mijn ghenedeghe Heere
Ende mijn vriende, daer wi vore af talen,
Mi anders hieten ende bevalen.
Ende oft ic emmermeer, sijts ghewes,
Contrarie dade van des voorseit es,
Oft ic iet dade oft holpe sterken,
Voort sette, voort keerde in woorden, in werken,
Oft in rade heimelijc oft openbare
Bi mi selven of bi wien het ware,
Dat wesen mochte in eneghen keere
Ieghen Minen ghenedeghen Heere
Ende minen andren heeren ghemeit,
Maghen ende vrienden voorseit,
In al oft in deele oft bi wien,
Ende in wat vueghen dat mocht ghescien:
Soe kennic mi selven nu als dan
Meineedich, valsch, versworen man,
Ende wille daer vore in allen keere
Ghenaemt, gheacht sijn emmermeere,
Gherekent, ghehouden tot int fijn
Van allen den ghenen daer vore mach sijn
Mijns oft mijns namen na of bi
Emmermeer ghewaeght, waer dat het si.’
Dits die substantie des briefs ende sen
Met meer woorden begrepen daer in.