Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXXXVI.

Vanden hertoge ende der stat van Tricht.

Hoe wel dat die van Tricht bleven
Bi der correctien voorscreven,
Nochtan heeft die hertoghe Jan
Tot haer beden, soet hem bracht an
Heer Reinere van Berghen, des seker sijt,
Drossate van Brabant te dier tijt,
Die XIII ambachten, si u vercleert,
Die te Tricht doen waren ghereduceert,
(Ende) weder bracht, verstaet den sen,
Tot drientwintich ambachten,
Soe si van outs daer plaghen te wesen;
Ende sende der voorseider stat van desen
Bi heer Reineren voorghenant
Sinen drossate van Brabant,
Sine bezeghelde opene brieve
Int stat van Bruessele ghegheven met lieve
In die selve maent, doe ic ghewach,
Van oeghste, den XXI^sten dach.
Ende voort beval ende laste Mijn Heere
Heer Reineren sinen drossate zeere,
Die voorghenoemde stat van Tricht
Te informeerne wel te richt
Om ieghen die baenrotsen in allen keere
Met hem, als haren gherechten heere,
Ende ieghen die edele desghelijc
Te blivene vast ende ghetrouwelijc.