Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXXXIII.

Van den heymelyken verbonde tusschen Eneghe van Tshertogen rade ende someghe porters der stat van Bruesele.

Als hen die zaken te dien tide
Tusscen die baenrotsen ter eender side,
Ende dedele des lants, hoort mi verclaren,
Ende dandere die bi den hertoghe waren,
Ter ander zide, met corten woorde,
Aldus scicten te discoorde,
Hebben die persoone, die wi vermonden,
Hier na te samen hen verbonden
In der manieren als volght hier naer.
Jan van Grimberghen, dits waer,
Heere van Assche, ende van Coudenberghe heer Jan,
Heer Everaert Tserclaes, hout u daer an,
Ridderen, ende voort daer na
Van Grimberghen Jan, heere van Aa
Ende van Hooghestein, sijts wijs,
Ende sijn brueder van Aa Cornielijs,
Reinere Moers, verstaet te recht,
Van Assche Jan ende Robbrecht,
Ghebruedere, dits ware vite,
Ende Jan Taye van Eelwite,
Daer na Wouter, Willem, Jan
Pipenpoy, ghebrueders, ende dan
Jan Taye van Gaesbeke, dits waer,
Gheldolf van Coudenberghe daer naer,
Jan Tseraernts, Diederijc de Loose,
Jaspaer ende Melchior, seide die prose,
Die men van Arkenen hiet,
Ghebruedere, ic en lieghe u niet,
Jan van Yedeghem ende Jan de Weert:
Dese persoone vore vercleert
Sijn bi wille, weten ende begheeren
Ende bevele hertoghen Jans haers heeren
Eens worden met malcanderen,
Ende overdroeghen onder danderen
Een gheselscap heimelike.
Trouwe ende vrientscap samentlike
Hebben si ghelooft ende ghesworen
Haer leefdaghe lanc sonder scoren
Vaste ende ghestentichlijc
Te houdene voort ende trouwelijc.
In den iersten te wetene, wilt onthouden,
Dat si, naest Gode, altijt souden
Hout ende ghetrouwe in allen keere
Hertoghe Janne sijn haren heere
In allen zaken, ende tallen reesen
Als des te doene soude wesen.
Sijn hooghe heerlijcheit ende recht voort an
Te sterken, te vordren ieghen alle man,
Hi waer groot oft hi waer smal,
Bescudden, verantwerden voor al
Sonder veinsen of simuleren,
Ende in allen plaetsen voortkeeren
Sijn eere, welvaert ende beste voordeel,
Ende sijn scade ende achterdeel
Ende archste verhueden ende wederstaen;
Hem daeraf waernen ende voort aen
Lijf ende goet al onghespaert
Daer vore setten, si u verclaert,
Alsoe verre als sijt, dits waer sermoen,
Met Gode ende met eeren mochten doen,
Ende behoudelec haren eet.
In allen manieren voort ghereet
Gheloofden si ende swoeren, verstaet den sen,
In allen saken deen den anderen
Bistentich, goet ende ghetrouwe daer mede,
Te sine in lieve ende in leede;
Ende dat elc van hen, dit onthoude,
Des anders last draghen soude
Ghelijc sijns selfs al geheel,
Sijn eere, beste ende voordeel
Prueven met herten ende met begheeren,
Sijn archste, scade ende sceemte weeren,
Verhueden ende waernen truwelijc,
Ende malcanderen gonstelijc
Doen ende bewisen vriendelike
Alle liefde, trouwe bruederlike,
In woorden, in werken verre ende naer,
Heimelijc ende openbaer,
Die si souden connen ende moghen
Ghedinken, ghepensen, ongheloghen.
Vernamen sij ooc, dit onthoude,
Dat hem iement ruerde oft rueren woude
Oft enich opset maecte mede
Oft pijnde te begripene, dits waerhede,
In contrarien in eneghen keere,
Van hertoghe Janne haren heere
Oft van harer enich, dat si u cont:
Sonder onscout souden si ter stont
Na alle haer macht dat wederstaen
Ende keeren dat, wilt mi verstaen,
Met live, met goede, vrienden ende maghen
Ende met (hen) allen, hoordic ghewaghen,
Den ghenen die si mochten wecken
Ende daer toe souden moghen trecken.
Daer inne en soude hem, wats ghesciet,
Deen van hen metten anderen niet
Noch vore den anderen in allen desen
Ontsculdeghen, maer altoos wacker wesen,
Willich ende bereet, manlijc, sonder letten
Lijf ende goet truwelijc daer bi setten,
Ghelijc als goede manne van eeren
Ende van den scilde sculdich weeren,
Ende ghetrouwe vriende, hoort mi tellen,
Heimelike ghebruedere ende lieve ghesellen
Te doene. Ende oft enich van hen,
Het ware een oft twee, meer oft men,
Selve dede oft doen dade
Met woorde, met werke oft met rade,
Ieghen enich der poente welc het ware,
Heimelijc oft openbare,
Oft dese heimelike vrientscap,
Gheselscap ofte bruederscap
Iemende anders die daer toe niet
En behoorde, verstaet tbediet,
Melde, condichde ocht openbaerden
Met ghescrifte, teekenen ocht met waerden,
Ocht hem pijnde die te scoren
Oft ooc enichsins te verstoren:
Dat die sijn soude, hoort mi scriven,
Eewelijc verstooten, ende bliven
Uut haren bruederscap, dit verstaet,
Ende gheselscap sonder verlaet,
Ende dat dandere van hen, sijts te binnen,
Die[n] achten souden, houden ende kinnen
Voor versworen ende trouweloos,
Meineedich, valsch ende eerloos,
Ende dat si die[n] souden verhaten
Ende verscuwen in alder maten,
Ende in allen plaetsen, ghelijc als men
Eenen arghen, valscen, meineedeghen
Scalc sculdich, des sijt ghewes,
Te verhaten ende te verscuwen es.
Met meer woorden ter vesticheit
Der heimeliker bruederscap voorseit
In den brieve daer op ghegheven,
Welken alle die persoone voorscreven
Bezeghelt hebben, dit es waer,
XIIII^c twintich Ons Heeren iaer,
In meie den XXIIII^sten dach.
Ende namaels sijn, doe ic ghewach,
Tot deser bruederliker vrientscap comen
Ende metten anderen aenghenomen
In alder manieren, des sijt ghewes,
Als hier boven vercleert es,
Ghelooft, ghesworen, wilt verstaen,
Als dandere voren hadden ghedaen,
Costijn van Aa, dit wel vernem,
Jan, Heinric ende Willem
Cluetinc, ghebruedere, dat wet,
Ende Heinric die Hertoghe daer met.
Ter oetmoedegher beden si u bekant
Der vijfentwinteghen vore ghenant
Heeft hertoghe Jan, si u gheseit,
Hare heimelike vrientscap voorseit,
Gheselscap, bruederscap, sijts ghewes,
Ende al dat in den brieven es
Daer op ghemaect wel verclaert,
Met sinen openen brieven ter vaert
Daer dore ghesteken, si vercleert,
Ghelooft ende gheapprobeert.
Welke brieve van confirmatien
Ghegheven waren, ic seker ben,
Int voorseide iaer, doe ic ghewach,
In junio den XXI^sten dach.