Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXXXI.

Vandes hertogen Verclaerne opter zoenen tusschen die vanden Heetvelde ter eender ende die van Lombeke ende dander straten ter ander zyde.

Groote veede was ende stont
In tiden voorleden, doe ic u cont,
Tusscen heer Janne, ter waerhede,
Heer Woutren ende heer Willeme mede,
Ridderen, die men van den Heetvelde hiet,
Ghebruders, dit es waer bediet,
Ende haer metplechters ter eender side,
Ende Janne van Lombeke tien tide,
Ende die kinderen van der Straten
Ende die met hem vielen te harer baten.
Welke veede, des sijt wijs,
Wilen hertoghe Anthonijs
Afleide ende suende wale,
Uutghenomen te dien male
Alderhande excessen van brande
Die waren ghesciet, ende menegherande
Quetsueren, die waren beganghen om tgone
Aen die goede ende persone
Der drie ghebruederen, si u bekant,
Van den Heetvelde vore ghenant.
Daer af si namaels, dit es waer,
XIIII^c XVII Ons Heeren iaer,
Des maendaeghs, doe ic u ghewach,
Na den beloken Paeschdach,
Ter begheerten, als ic ter waerheit vant,
Hertoghen Jans van Brabant
Hem keerden ende submitteerden int fijn
Ten segghene ende ordinantien sijn.
Welke submissie achtervolghende dan
Dedinghde die voorseide hertoghe Jan
Een gheheel soene wel gheraect.
Daer op dat hi heeft ghemaect
Sijn ordinantie wiseleken,
Die hi seide ende dede uutspreken
Tusscen die voorseide partien
Int selve iaer, dit der ic lien,
Twintich in junio te waren.
In welke uutsprake sijn verclaren
Die hertoghe te hemwert behilt.
Dus wert hi namaels soe ghewilt,
Bi inghevene, ter waerheide,
Van Rutgheer Boene, alsoe men seide,
Dat hi int iaer van twinteghen al bloot
Die drie ghebrueders voor hem ontboot
Te Bruessele in sijn hof, dits waer,
Ende hen comende sijnde al daer,
Dede hi hen segghen houde
Dat hi sijn verclaren doen woude
Opt segghen van der suenen voorseit.
Daer op die brueders antwerden ghereit,
Segghende dat si tot dien tiden
Die soene wel van harer siden
Ghehouden hadden in allen zaken,
Hopende dat haer wedersaken
Daer af hem niet becreunende en waren:
Alsoe begheerden si gheen verclaren
Daer af te hebbene, ende sonder beiden
Sijn si dus buten hove ghesceiden;
Ende trocken herde cort na dat
Uut Bruessele te Lovene in der stat,
Daer si sonder langhe beide
Poorters worden, alsoe men seide
(Daer si te voren ooc te waren
Van Sinte Peeters manscap waren);
Daer op si hoopten ende hen verlieten
Dat si dier vriheit souden ghenieten.
Ende in haer absentie alsdan
Heeft van Brabant hertoghe Jan
Sijn verclaren ghedaen van dien zaken,
Ende daer op sijn open brieve doen maken,
Die hi den ghebruederen tien stonden
In der stat van Lovene heeft ghesonden.
Daer mede hi, soe men mi telde,
Die ghebrueders van den Heetvelde
Seker bedevaerde beval tehant
Te treckene, ende sijn lant
Van Brabant te rumene sonder respijt,
Ende daer ute enen zekeren tijt
Van jaren te blivene, si u bekant.
Twelke die ghebrueders tehant
Den edelen ende goeden steden
Van Brabant toonden ende opdeden,
Claghende dat si van inde torden
Buten weghe van rechte gheleit worden;
Ghemerct dat si, zi u vercleert,
Hen hadden alleene ghesubmitteert
Van den branden ende quetsueren twaren
Die aen hen ghesciet waren
Ende aen haer goede, daer af dat
Si billijcs souden hebben gehat
Beternesse, docht hen als dan.
Ooc seiden si dat hertoghe Jan
In sijn uutsprake behielt te waren
Die macht van eneghen verclaren
Te moghen doene, doe ic ghewach,
Tusscen dat ende Paeschdach.
Ende dies ghedroeghen si hem wale
Toten brieven principale
Des voorseiden segghens, dat es claer;
Ende want langhe overleden waer
Die tijt binnen welken, dits waer sermoen,
Hi tverclaren mochte doen,
Want binnen den tide niet en sciet,
En hielden sijs van weerden niet.
Aldus sijn si te Lovene bleven
Sonder den verclarene voorscreven
Ghehoorsam tsine in allen sinne,
Oft die correctie daer inne
Begrepen te voldoene na dat,
Maer bleven te Lovene int stat.