Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXXIX.

Hoe hertoghe Jan van Brabant tregiment synre lande van Hollant, Zeelant ende Vrieslant beval hertoghe Janne van Beyeren sinen oem.

Als tiaer Ons Heeren stont ghescreven
XIIII^c, twintich daer neven,
Cort na Paesscen, doe ic ghewach,
In aprille den XXVII^sten dach,
In der stat van Antwerpen, dats waer,
Ordeneerde ende maecte aldaer
Hertoghe Jan, nu merket tgone,
Dese navolghende persone,
Heer Janne van Grimberghen van Assche heere,
Janne sinen oudsten sone, ende meere
Meester Jan Bont, verstaet tbediet,
Claese die[n] men van den Werve hiet,
Bernaert Utenenghe, hout u daer an,
Reinere Moers ende van den Huffle Jan,
Ende Claeus Colensone tier stont
Tsinen rade, ende heere Willem Bont
Sinen secretarijs, in waerder spraken,
Om met hem tot allen sinen zaken
Te verstane, dus waest sijn wille.
Daer na, den lesten dach van aprille,
Der selver maent, maecte hi na tgone
Den voorseiden Claeuse Colensone
Sinen zeghelere ende beval hem claer
Truwelijc daer toe te nemen waer.
Welke Claeus, daer wi af lesen,
Der stat clerc van Antwerpen hadde ghewesen;
Ende ooc desghelijc, wilt weten,
Rutgheer van Tefelen, anders Boene gheheeten,
Die ooc te voren, sijt seker das,
Der stat clerc van Bruessele was,
Wert ghemaect in der selver wijs
Des hertoghen secretarijs,
Ende clerc van den leenboeke daer toe.
Hier na trac hertoghe Jan aldoe
Uter stat van Antwerpen sekerlike
In Zeelant, tot Sinte Mertens dike,
Op heeren Floreis van Borsele huus,
Ende beval daer, hoort hier abuus,
Ende gaf over, verstaet den sen,
Hertoghe Janne van Beieren
Tregement sijns lants van Hollant,
Van Zeelant, ende van Vrieslant,
Ende maecten daer af, si u bekent,
Gouverneur, rewaert ende regent
Van sinentweghen, in den name van hem,
Na uutwisen der brieven, dit vernem,
Die openbaerlijc daer af waren ghescreven
Tot Sinte Mertens dike ghegheven.