Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXXVIII.

Vander correctien gheset op her Janne den hertoghe riddere ende op Ghijsbrechte Pypenpoy.

Int selve iaer, doe ic ghewach,
Van XIX, opten achtiensten dach
Van februario, dit es waer,
Ten versueke ende bevele claer
Hertoghen Jans van Brabant,
Bi den amman ende scepenen tehant
Van Bruessele, worden twee goede mannen
Te Bruessele ter poyen uutghebannen
Heer Jan de Hertoghe, een ridder goet,
Ende Ghijsbrecht Pipenpoy, sijts vroet.
Te wetene waer omme si u berecht:
Want die selve Ghijsbrecht
Soude hebben ghesproken, hoordic verclaren,
Onnutte woorde, de welke waren
Contrarie ende scamelijc
Hertoghe Janne, ende desghelijc
Den scepenen van Bruessele te dier tijt
Lachterlijc, des seker sijt:
Dat hi daer omme, dit onthoude,
Voortane eewelijc bliven soude
Buten den rade van der stat
Ende regemente, ende ooc dat
Hi voortane nemmermeere
Officie en soude van den Heere
In Brabant hebben noch bedrijf.
Voort wert hi ghebannen op sijn lijf
Uten palen, hoort mi verclaren,
Van Brabant den tijt van XV jaren.
Ende want die voorseide heere heer Jan
Daer over was bi ende an,
Daer Ghijsbrecht Pipenpoy voorseit
Alselke woorde hadde gheseit
Onscemelike, lelike, sijt seker das,
Dier hi hem ghenoech ghevolgich was,
Alsoe men seide, in lieghe u niet,
Al en sprac hi soe onbesceedelijc niet
Als die voorseide heer Ghijsbrecht dan:
Soe wert daer omme die selve heer Jan
Ghecorrigeert, dits waer sermoen,
Enen wech selve te doen
TSinte Jacobs in Compostelle doe
In Galissien, ende daer toe,
Na dat hi die bedevaert hadde ghedaen,
Te rumene ende te blivene voortaen
Uten palen van Brabant sonder blijf
Den tijt van drie iaren, op sijn lijf.
Dese conrectie ghesciede, doe ic ghewach,
Opten voorseiden achtienden dach
Van februario, hout u daer an,
In presentien van den hertoghe Jan,
Bi amman ende scepenen segghic di
Van Bruessele; daer ooc stonden bi
Den voorscreven hertoghe, als ic meine,
Willem ionghe greve van Zeine
Heere van Sinte Aechtenrode, dats waer,
Die bi den hertoghe stont aldaer,
Ende Jan heere van Wesemale
Ende van Phaleis alsoe wale,
Ende van Cuyck mijn heer Jan,
Heere van Hoochstraten, ende voort an
Jan van Schoonvorst, in goeden trouwen,
Die borchgreve was te Montjouwen,
Heere te Cranendonck sekerleke
Ende heere te Diepenbeke.
Jan van Glimes, des neemt goom,
Heere te Berghen opten Zoom
Ende te Grimberghen, hier op merke,
Ende heer Cornielijs van Liedekerke
Heere van Lens, hout u daer an,
Ende van Grimberghen heer Jan,
Heere van Assche, sijt seker das;
Willem sijn brueder ooc daer was;
Heer Jan Scoonians, dits ware leere,
Reinere Moers ende ander meere.