Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXXVII.

Vander doot hertoge[n] Jans van Bourgognen ende vanden huwelike des coninx van Jnghelant metter dochter des coninx van Vranckerycke.

Tusscen den dolphijn van Vrankerijc
Ter eender ziden zekerlijc,
En ter andere, des sijt vroeder,
Hertoghe Jan, Anthonijs broeder
Van Bourgognen, neemt des goom,
Nu hertoghen Jans van Brabant oom,
Waren heimelijc, als ic oorconde,
Vrientscapen ghemaect ende verbonde
Ende bezeghelt, dits waerheit fijn;
Na twelke die voorseide dolphijn
Den voorscreven hertoghe Janne ontboot
Van Bourgognen, dits waerheit bloot,
Om tsamen te tracteerne tehant
Hoe men den coninc van Inghelant
Soude moghen wederstaen,
Die der Franscer cronen hadde ghedaen
Ende daghelijcs dede groot achterdeel,
Ende van Normandien tmeeste deel
Ghewonnen ghecreghen hadde met machte,
Ende ter selver tijt met heercrachte
Vore die stat laghe van Ruwaen.
Hertoghe Jan van Bourgognen, die hem aen
Die vrientscap hielt ende die verbonde
Die tusscen den dolphijn ende hem tier stonde
Ghemaect waren, alst voorseit es,
Hier op vertroost, hem verlatende des,
Es ten ontbiede, dits waerheit fijn,
Ghetoghen tot den dolphijn
Met cleinder macht, onghewapender hant,
Op tslot van Monstreul, si u bekant.
Als hire binnen was, ongheloghen,
Worden die brugghen op ghetoghen
Ende die poorten ghesloten, soe ic vernam,
Ende als hi in der presentien quam
Van den voorseiden dolphijn, dits bloot,
Wert hi terstont ghesleghen doot.
Dese slach ghesciede, dits waer,
XIIII^c XIX Ons Heeren iaer
In der maent van septembri.
Na twelke Philips, dat segghic di,
Des voorseiden hertoghen Jans sone
Van Bourgognen - die gone
Hadde gheheeten tot dier tijt
Greve van Charloys, des seker sijt -
Die dede soe vele altehant,
Dat coninc Heinric van Inghelant
Te wive ghecreech sekerlijc
Des coninx dochter van Vrankerijc
Vrouwe Kathelinen, sijt seker das,
Die sconincs ioncste dochter was.
Daer mede ontfinc hi, der ic lien
Thertoghedom van Normandien
Te huwelike, groot ende cleene,
Ende ontfinct van den coninc te leene
Van Vrankerike, dits waerhede,
Daer af [hi] hem hulde ende manscap dede.
Ooc waest bevoorwaert claerlijc
Dat, oft die coninc Heinrijc
Van Inghelant bi den live
Van Vrouwe Kathrinen sinen wive
Mansoor ghecreghe, dat dan al bloot,
Na des conincs van Vrankerike doot,
Trike hebben soude ende coninc wesen,
Dat die dolphijn vore ghelesen
Verbeurt hadde in eewicheit
Mids der doot hertoghen Jans voorseit.
Soe soude die dolphijn daer wi af scriven
Eewelijc der croonen berooft bliven.
Hier met ende met meer verbonden
Ende ander voorwaerden sijn tien stonden
Beide die coninghe achemant
Van Vrankerike ende van Inghelant
Vereenicht, versoent onder hen
Bi toedoene ende middele des hertoghen
Philips van Bourgognen, die sone was
Wilen hertoghen Jans, sijt seker das;
Welke hertoghe Philips algader
Die doot van sinen voorseiden vader
Hier mede ende anders derghelijc
In menegher manieren soe grootelijc
Ghewroken heeft, dat alle die gone
Gheseten onder die Fransce crone,
Gheestelike ende ooc werelike,
Edele, onedele, arme ende rike
Dies hebben ghevoelt langhe ende vaste
Te haren verderfeliken laste,
Ende ter destructien des rijcs daer bi.
God betert alst sijn wille si