Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXXVI.

Vanden privilegien als vanden lieutenant des ammans van Bruesele ende vanden scepenen te moeten maken op St Jans avont, etc..

Int voorseide iaer, doe ic u cont,
Op Sinte Jans Baptisten avont,
Als noch gheen ander amman en was
In die stede, sijt zeker das,
Van Willeme van Assche die, soe ghi wet,
Van den ammanscape was gheset
Bi der stat, alst voorseit es,
Daer bi en woude, sijt seker des,
Hertoghe Jan mids den gonen
Uut den eenentwintich persoonen
Die hem die scepenen, hoordic oorconden,
Na ghewoonte hadden overghesonden,
Gheen nuwe scepenen maken daer,
Ende alsoe bleef die stat, dits waer,
Van Bruessele van dien S^t Jansmesse
Omtrint drie weken, sijts ghewesse,
Sonder scepenen van hertoghe Janne,
Uten cosen die hem die goede manne
Over hadden ghesonden te makene, tswaer;
Waerbi der selver stat aldaer
Onverwinlike commer doe
Ende verderfelike scade toe
Hadde moghen comen ongespaert.
Om twelke te verhuedene, soe waert
Daer toe ghesproken soe verre tien tiden,
Dat die hertoghe ter eender siden,
Entie stat ter ander, ongheloghen,
Eneghe van den rade shertoghen
Ende den drien goeden steden
Loven, Antwerpen ter waerheden,
Ende sHertogenbosche, gheloofden int fijn;
Die daer omme vergedert sijn
Te Vilvorden, doe ic u ghewach,
Soe dat wort opten XVI^sten dach
Der maent van julio, dat ghijt wet,
Jan Taye van Eelwite in die stat gheset
Van Willem van Assche, hout u daer an,
Te Bruessele tot eenen amman,
Ende heer Jan van Coudenberghe, dit vernem,
Willem van Mors, Philips met hem
Dien men hiet van Kesterbeke,
Ende Reinere van Linckenbeke,
Ende van der Coudenborch Symoen,
Heinric Veele, verstaet dit doen,
Jan Taye van Gaesbeke, dese wel geraecte
Die hertoghe doen scepenen maecte
Te Bruessele. Ende om dat van dien
Ghelike niet meer en soude ghescien
In toecomenden tiden na dat,
Soe heeft die voorseide stat
Van Bruessele verworven, ic seker ben,
Scoone ende goede privilegien:
Alsoe dat die hertoghe altoos voortan
Moet stellen enen notabelen man
Om stedehouder te sine in waren zaken
Van den amman dien hi te Bruessel sal maken,
Ende macht sal hebben des daer ane cleeft
Van shertoghen weghen, die damman heeft,
Wanner als damman, sijt seker des,
Uter stat oft uten ooghen es,
Oft wanneer damman, soe mi docht,
Van tween scepenen wert versocht
Iet te doene, dits waer sermoen,
Van des hi sculdich es te doen,
Ende hijs hem weighert blikelijc
Oft onwillich maect; ende desghelijc
Oft in den amman ende in den lieutenant
Ghebrec gheviele, soe moghen tehant
Die scepenen van Bruessele oft die II van hen
Eenen ghesworenen knape, verstaet den sen,
Des ammans daer toe nemen ghereede
Die hem ghenoecht, ende dien met eede
Daer toe verbinden ernstelelijc.
Ende oft ghebeurde desghelijc
Dat die hertoghe daer nare
Teeneghen tiden ghebrekelijk ware
Uten cose die hem tallen stonden
Die scepenen hadden over ghesonden,
VII scepenen te makene, doe ic u cont,
Op Sinte Jans Baptisten avont
Vore der noenen: dat dan saen
Die VII scepenen die afgaen
VII nuwe scepenen onvertoghen
Selen maken ende kiesen moghen;
Met meer poenten, verstaet den sen,
Vercleert in der privilegien.