Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXXV.

Van heeren Janne van Walenroode ende heere Janne van Heynsberghe bisscoppen te Luidicke.

Want hertoghe Jan van Beieren voorscreven
Tbisdom van Ludike heeft over ghegheven,
Dat hi XXVIII iaer, sijts ghewes,
Beseten hadde, alst voorseit es,
Soe versach paus Merten daer omme
Die vijfste van dien bisdomme
Ende gaeft. Dit ghesciede ieghenode
Heeren Janne van Walenrode
Die te voren, sijt seker das,
Ertsbisscop Righensis was.
Twelc hi liet, alsic vernam,
Ende wert bisscop, ende quam
Te Ludike daer hi betemelike
Was ontfaen ende eerlike
Int iaer van XVIII opten IIII dach
Van oeghst, als ic u segghen mach.
Eerbaerlijc regeerde hi daer
Tvoorseide bisdom min dan een iaer,
Want hi sterf cort daer naer,
XIIII^c XIX Ons Heeren iaer,
In meie den XXVIII^sten dach.
Int selve iaer, opten XVI^sten dach
Van junio, coren onder hen
Die heeren van der Capittelen
Van Sinte Lambrechte, merket tgone,
Janne des heeren van Heinsberch sone
Tot enen bisscop, sijt seker das,
Die welke die canonic was
Ende archidiaken van Haspegouwe
In der voorseider kerken te goeder trouwe;
Doen men hem coos, dat wet voor waer,
Hatti omtrint XXIII iaer.