Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXXIII.

Vander doot Willems vanden Berghe.

Hier na, als sonder onderlaet
Mijn Heere, Mijn Vrouwe haren staet
Te Berghen dus hielden, des seker sijt,
Soe ghebeurdet op enen tijt,
Op enen dach in die maent van meerte,
Dat Mijn Heere met bliden gheveerte
Na maeltijt reet jaghen, dat versinne;
Ende Mijn Vrouwe die hertoghinne
Reet uut vlieghen, dat verstaet,
Ende Willem van den Berghe, nauste raet,
Rentmeester ende camerlinc
Des hertoghen van Brabant, die ghinc
In sijn camere binnen den hove
Op een coetsbedde van love
Ligghen rusten. Daer quamen tehant
Die bastaerde van Hollant
Ende brachten oneerlijc ter doot
Willeme van den Berghe, dits bloot,
Daer hi lach en sliep, tehant.
Om welke daet, alst waert bekant,
Hertoghe Janne, die goede heere,
Toter doot toe bedroeft waert zeere;
Alsoe hijt bewees met trouwen
Met suchten, met claghen, met druc, met rouwen,
Met screiene, met teekenen blikelijc
Wel drie daghe durende eenpaerlijc.
Daer na hadde hertoghe Jan begheerte,
Opten XXIX^sten dach in meerte,
Rekeninghe te hebbene ende besceit
Van der weduwe Willems voorseit
Ende bewijs van alle den ontfanghe
Van des hi van over langhe
Van sinen weghen hadde ontfaen;
Ende van dier tijt voort aen
Tempereerde die hertoghe, hoordic saghen,
Den rouwe die[n] hi hadde ghedraghen,
Ende kenlike teekene die hi hadde bewesen
Bi der doot Willems vore ghelesen.
Maer na de doot Willems van Orbeys
Creech eerst heer Heinric sinen peys,
Hoe wel hi daer na, sijts ghewes,
Niet langhe en leefde, alst voorseit es;
Ende desghelijc maecte Mijn Vrouwe
Den peys van den ionker van Nassouwe,
Dat hi ter gracien ende gunste quam
Van den hertoghe; als ic vernam,
Waest bij middle Mier Vrouwen vorwaer
Ende des heeren van Rotselaer,
Die doen ter tijt, si u bekant,
Drossate was van Brabant.
Int iaer van XVIII, hoore die wille,
Opten XII^sten dach van aprille,
Ende daer na, doe ic ghewach,
In die selve maent den XV^sten dach,
Opten Paeschavont, hier op merke,
Waert heer Cornielijs van Liedekerke
Drossate van Brabant tsijnre eere;
Ende van Rotselaer die heere,
Na die doot Willems van den Berghe scier,
Waert van Brabant tresorier,
Ende van nu voortane meere
Scriven wi tiaer van Onsen Heere
Dusent IIII^c X ende neghen.
God laet ons altijt dooghden pleghen!