Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXX.

Hoe die paews aen hertoghe Janne van Brabant schreef als vander dispensatien, enz.

Cort hier na, hebbic vernomen,
Es hertoghe Jan uut Hollant comen
Tot Antwerpen, in den godshuse aldaer
Van S^t Machiels, ende cort daer naer
Int iaer voorseit, opten iersten dach
Van october, doe ic ghewach,
Sijn bi hem comen altehant
Van Cortenberghe meester Amant
Doctor ende deken van Sinte Donaes
Te Brugghe, ende, die niet en was dwaes,
Meester Lonijs van Baest, hoort mi lien,
Bacheleer in theologien;
Die hebben den hertoghe vore vercleert
Van spaus weghen ghepresenteert
Een besloten bulle, dits waerhede,
Daer die paus begheerde mede
Aen den hertoghe, verstaet die wise,
Dat men meesteren Amande ende Lonijse
Volcomelijc ghelooven woude
Van dat men hem segghen soude
Van sinen weghen ende aenbrenghen.
Dese bulle, verstaet die dinghen,
Van gheloove, die was ghegheven
Te Genevere ende ghescreven
Opdie V^e kalende van septembri,
Den XXVIII^sten dach, segghic di,
Der maent van oeghste int selve iaer
Van achtienen, dat es waer.
Welke bulle die hertoghe Jan
Weerdichlijc ontfinc, hout u daer an,
Alst wel beteemde sonder waen;
Ende als hi dinhout hadde verstaen
Van der voorseider bullen ende den sen,
Hebben hem die twee meesteren
Van des paus weghen voregheleit,
Ende uut crachte der bullen gheseit,
Dat die paus die dispensatie
Wederroepen hadde ende die gracie
Die hi ghegheven hadde ende ghedaen,
Op die letsele, wilt verstaen,
Van den huwelike, dat elc verstaen,
Tusscen hem ende Vrouwe Jacoba:
Dat uut vreesen was ghesciet
Van den Roomscen coninc ende anders niet.
Maer alsoe sciere als hi ware
Over berch, soude hi daer nare
Die revocatie annicheleren
Ende dierste dispensatie confirmeren;
Ende dat die voorseide hertoghe Jan
Ende Vrouwe Jacoppe voortan
Sonder last van consciencien
Mochten tsamen bliven, verstaet den sen,
In den huwelijc voortaen
Dat si tsamen hadden aenghegaen.
Ende desghelijc screven tehant
Aen hertoghe Janne van Brabant
Die cardinael Ostiensis meer no men
Entie patriarche van Constantinopolen.
Hier met was hertoghe Jan die heere
Vertroost, verblijt van herten zeere
Ende ghevreet, ic seker ben,
In sijnder consciencien.