Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXIX.

Van Willeme vanden Berghe hertoghe Jans van Brabant tresorier ende Willeme van Assche amman te Bruesele.

Na topbreken sbesets voorscreven
Heeft Willem van den Berghe bedreven,
Ende hertoghe Janne in die oore ghesteken,
Ende vermaect met sinen treken
Den ionker van Nassouw, dit versta,
Heere ter Lecke ende te Breda,
Ende van der Lecke desghelijc
Heer Heinric, heere van Heeswijc,
Ende heer Heinric van Berghen int fijn
Heere van Grimberghen ende van Melijn;
Soe dat die hertoghe van hem was
Seere qualijc te vreden, mits das
Hi van Willeme vore vercleert
Contrarie van hem was gheinformeert.
Soe dat die hertoghe sprac dese woorde,
Daert mijn Vrouwe ende haer moeder hoorde:
Datti die drie heeren welgheboren
Niet meer en wilde sien noch hooren.
Willem van den Berghe, die dit bedreef,
Te dier tijt dat men hem screef
Tresorier van Brabant, dit verstaet,
Kamerlinc ende heimelijc raet,
Van al dat den hertoghe doen quam bi
En was niement soe wel ghelooft als hi.
Tlant van Brabant hadde tien stonden
In Hollant een ambassiaet ghesonden
Aen den hertoghe haren heere,
Den abdt van Tongerloe, ende meere
Heer Heinric van Berghen, ic seker ben,
Heer Aernde van Crayenhem met hen,
Heere van Grobbendonck tier stonde,
Ende van Dynter meester Emonde;
Ende als si te Gorichem quamen,
Daer si die niemare vernamen
Dat die hertoghe, als ic vore las,
Op die drie heeren vertorent was:
Heer Heinric van Berghen, dat verstaet,
Die selve was int ambassiaet
Ghedeputeert, als ic voorseide,
Sant om den ionker sonder beiden
Van Nassouwe, ende sonder vertrec
Om heer Heinric van der Leck.
Met desen heeren vore ghenant
Wert overdraghen na alle ghestant,
Dat heer Heinric van Berghen tien tiden
Mids desen niet voort en soude riden;
Maer dander ambassiatuers int fijn
Souden in der absentien sijn
Haer bootscap doen, in lieghe u niet,
Aen den hertoghe; dus eest ghesciet.
Ende als die ambassiatuers twaren
Uut Hollant in Brabant comen waren,
Ende haer ambassiaet ghedaen,
Soe wert int selve iaer wel saen
Van XVIII, opten XIIII^en dach
Van septembri; daert menich sach,
Bi den goeden steden van Brabant
Willem van den Berghe vore ghenant
Te Lovene int stat, si u vercleert,
Openbaerlijc ghecorrigeert;
Ende als men die correctie voorseit
Te Bruessele, na ghewoonlicheit
Van der stat, aldaer uut roepen soude
Ende publiceren, soe en woude
Willem van Assche, die amman was
Te Bruessele, hoe wel hem das
Die scepenen versochten bi te stane,
Niet doen; mids dien voortane
En wilden die scepenen, wats ghesciet,
Den voorscreven Willeme emmer niet
Voor amman kinnen, verstaet den fijn,
Noch wisen noch ghehoorsaem sijn;
Maer si dadene sonder letten
Vanghen ende in der Vroenten setten,
Daer hi inne sat, si u bekent.
.....