Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXVI.

Vander Antwerden die dlant van Henegouwe gaf op tversuec hertoghen Jans van Beyeren.

Op die poente, alsoe mi dochte,
Die hertoghe Jan van Beieren versochte
Aen tlant van Henegouwe voorscreven,
Hebben si ter antwerden hem ghegheven,
In ghescrifte, verstaet mijn leere,
‘Dat hen verwonderde al te seere
Dat die Roomsce coninc voorwaer
Meinde enich recht te hebbene daer,
In den lande van Henegouwe, dat wet,
Van Hollant ocht van Zeelant met;
Want si van ouder daten voor dien
Bezeghelde brieve hadden ghesien,
Daer met die vierde, sijt seker das,
Lodewijc, doen hi Roomsce coninc was,
Claerlijc belijt heeft ende bekint
Dat hi toten lande van Hollant twint
Noch van Zeelant in gheenre maniere
Recht en hadde eneghertiere,
Dan die homagie alleene
Ofte manscap, hoort wat ic meene;
Ende daer toe hadden si tote dien,
Onder die gulden bulle ghesien
Ander brieve verleent properlijc
Bi den selven vierden Lodewijc
Na datti keiser was ghecoren,
Daer mede hi met consente, wilt hooren,
Van sinen princen, des sijt ghewes,
Gheconfirmeert heeft dat voorscreven es.
Van den lande van Henegouwe screven si
Dattie Roomsce coninc verre noch bi
Daer in recht en hadde clein noch groot,
Noch sijn vorders, segghic u bloot,
Ende dat men ooc van siere ghewelt
Al met allen niet en helt,
Hoe wel dat het, sijt seker des,
Int keiserrike gheleghen es.
Ooc eest dicwile op dochteren bleven
Ende verstorven, als haer leven
Die heeren lieten in dier maten
Sonder mansoor na hem te laten,
Als op Sinte Waldetruden, verstaet dat,
Wier lichame rust te Berghen int stat;
Die welke was een erfvrouwe
Ende grevinne van Henegouwe,
Ende hadde te manne Sinte Vincente
Die van haren weghen die regemente
Van Henegouwe droech, hielt ende besat
Als haer man ende momboor, verstaet dat.
Desghelijcs Vrouwe Ricault, des seker sijt,
Ende daer na die Vrouwe Alijt,
Ende mijn Vrouwe die keiserinne, sijts vroeder,
Die was sijns selfs ouder moeder,
Daer af die heerlicheit quam algader
Op hertoghe Aelbrechte sinen vader.
Ooc eest costume alsulc in trouwen
Ende recht int lant van Henegouwen
Alsulc, verstaet dit wel ende hoore,
Dat, bi ghebreke van mans oore,
Die banieren ende heerlicheiden tswaer
Opdie vrouwen verstorven daer.
Bi deser redenen vore vercleert
Ende zeere slinkelijc gheinformeert
Die Roomsce coninc, dat es claer,
Hadde hi gheweten alle twaer
Van dat voorscreven es ende vertoghen:
Hi hadde hem bat beraden moghen
Ende aviseren, des en hebt gheen waen,
Eer hi die ghifte soude hebben ghedaen.
Ende alsoe bidden si voort an
Van Beieren den hertoghe Jan
Dat hi te rechte wille aviseren
Den voorseiden coninc ende informeren
Metter waerheit ende anders niet,
Ende datti hen allen, wats ghesciet,
Wille houden voor gheexcuseert
Van des hi aen hem hadde begheert,
Als dat sine voor heere wilden ontfaen;
Want si hulde ende eede hadden ghedaen
Ende manscap harer erfvrouwen
Siere nichten: die wouden si met trouwen
Haer trouwelijc houden in alder maten,
Als goede gherechte ondersaten
Sculdich waren te doene, sonder si.
Voort wisten si wel, dat screven si
Hem: dat hi selve ter waerheit
Van Mier Vrouwen siere nichten voorseit
Verhaven hadde tselve lant
Dat hi daer hadde, si u bekant,
Daer af hi haer, des was gheen waen,
Hulde ende eet hadde ghedaen.
Ten lesten baden si hem met begheeren
Datti hem wel wille aviseren
Ende bedinken die edele, sijts ghewes,
Lynagie daer hi af comen es,
Ende die gonst ende vrientscap claer
Die hi sculdich te draghen waer
Tot siere nichten ghetrouwelijc
Ende haren landen desghelijc;
Ende dat ghescil, hoort mi dichten,
Tusscen hem ende Mier Vrouwen siere nichten
Gode es seere onbehaghelijc
Ende allen den ghenen zekerlijc,
Diese beide minden opter eerde.
Ende oft hi iet te eiscen begheerde
Van Mier Vrouwen siere nichten voorseit,
Dat hi dat [dede] met zueticheit
Ende goeder manieren, sonder vreemt ghelaet,
Altoos ghebrukende goeden raet,
Ende altoos gheloovende int fijn
Sinen naesten ende goeden vrienden sijn.’
Dese antwerde was in desen maten
Te Berghen ghegheven bi den drien staten
Van Henegouwe opten XI^sten dach
Van meie die int iaer Ons Heeren lach
XIII^c XVIII. Alsoe ict hoorde,
Hebbic gheset die naeste woorde
Ende die substantie ende den sen,
Luttel woorde meer ocht min.