Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXIV.

Hoe hertoghe Jan van Beyeren aenden Roemschen coninc vercreghen heeft dat graefscap van Henegouwe, Hollant ende Zeelant ende wat hij aen die selve lande versochte.

Nu keeren wi weder onsen sen
Op hertoghe Janne van Beieren,
De welke sonder enich riguer
Met sinen wetteghen procuruer
Daer toe ghestelt zunderlinghe,
Ende mechtich ghemaect der dinghe,
Verteghen heeft ende gherenuncieert
In des paus handen, si u vercleert,
Te Constans in der Concilien, dat wet,
Op die kerke ende bisdomme met
Van Ludeke, dat hi, dat es claer,
Ghehouden hadde XXVIII iaer;
Ende heeft daer na, verstaet den sen,
Met oorlove ende dispensatien
Van den paus al sonder letten
Ghetrout Vrouwe Elisabetten
Van Lutzenborch hertoghinne,
Weduwe wilen, dat versinne,
Van den edelen hertoghe Anthonijs
(Wiens ziele God bringhe int paradijs!),
Niet wederstaende dien zaken
Dat hi was subdiaken
Ende tbisdom, als ic u dede verclaer,
Ghehouden hadde XXVIII jaer,
Ende oec niet ieghenstaende das,
Dat hi haer ghevadere was;
Want hi haren sone, dien si
Van hertoghe Anthonise, segghic di,
Van Brabant hadde blikelijc,
In den doopsele sekerlijc
Ghehaven hadde, hier op merke,
Te Bruessele in Sinte Goedelen kerke.
Aldus heeft hi overghegheven
Tbisdom van Ludeke sonder sneven,
Ende sijn vriende ghelaten daer
Met cranken trooste, wet voor waer,
Oft testamente verwaert van hem,
Die [hen] nochtan dicwile, dit vernem,
Om sinen wille in sorghen groot
Gheset hadden, ende toter doot
Hen dicwile badden ghewaeght.
Waest wonder ocht hem dit meshaeght?
Voort heeft hi verworven subtilike
Aen den coninc van den Roomscen rike
Dat hi hem ghegheven heeft te hande
Die graeflicheden ende lande
Van Henegouwe, van Hollant zamentlike
Ende van Zeelant, als opt Roomsce rike
Verscenen bi den doot, verstaet den sen,
Hertoghen Willems van Beieren,
Om datti ghestorven was in der maten
Sonder wettich mansoor van hem te laten.
Dit heeft die Roomsce coninc te hant
Ghecundicht den hertoghe van Brabant
Met sinen brieven int openbaer
Te Constans ghegheven in Ons Heeren iaer
XIII^c XVIII, hoort dit gheveerte,
Opten XXIX^sten dach van meerte,
Hem scerpelijc bevelende met nernsticheit
Dat hi hem der lande voorseit
Van Henegouwe, Hollant ende Zeelant
Niet meer en bewonde, maer sijn hant
Daer af ganselijc dade te male.
Hier na heeft, met corter tale,
Hertoghe Jan van Beieren te hant
Als greve van Henegouwe, van Hollant
Ende van Zeelant in corten stonden
Sijn open plackaetbrieve uutghesonden
Aen allen vorsten, greven ende heeren,
Vrien, ridderen, knechten van eeren
Ende aen die steden altehant
Van Henegouwe, Hollant ende Zeelant,
Claghende over den hertoghe rijc
Ende sier nichten derghelijc,
Die hem met wille ende met ghewouden
Sijn recht vaderlijc erve onthouden,
Twelc hem die Roomsce coninc voorscreven
Ooc beleent heeft ende ghegheven;
Ende heeft den vorsten menichfout
Om helpe ghebeden ieghen tgroot ghewout
Ende onrecht ende onsede
Dat die hertoghe Jan hem dede
Van Brabant ende desghelike
Sijn nichte van Hollant claerlike.
Ende desghelijc versocht hi mede
Aen die voorseide goede stede
Dat si hem sonder verhouden
Hulde ende eede doen wouden,
Alsoe si haren gherechten heere
Sculdich waren te doene min no meere.
Ghemerct dat si van den eeden,
Hulden ende manscape, die si deden
Siere voorseider nichten van Hollant
Ende hertoghe Janne van Brabant,
Alinghe ende al met corten woorden
Claerlijc quijt ghescouden worden
Van den Roomscen coninc openbaer,
Na uutwisen sijnder brieven daer,
Als hi hem sant ten selven termine
Copie bescreven in latine
Metten duutsce daer uut ghetranslateert.
Hier af heeft hi van hen begheert
Een bescreven antwoorde, soe mi dochte,
Op datti hem daer na rechten mochte;
Op twelke die steden altehant
Van Hollant ende van Zeelant
In der substantien, na mijn verstaen,
Haer antwoorde hebben aldus ghedaen: