Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXIII.

Hoe hertoghe Jan van Brabant inden lande van Henegoume, Hollant ende Zeelant ende vrouwe Jacoba inden voorseiden lande van Brabant ontfanghen wordden.

Na dat tvoorseide huwelijc
Ter eeren Gods tusscen den hertoghe rijc
Van Brabant, sijt seker das,
Ende Mier Vrouwen volbracht was,
Soe es de voorseide hertoghe Jan
Als momboor ende wettich man
Ende vooght van der voorseider Vrouwen
In die steden van Henegouwen,
Van Hollant, van Zeelant ter waerheit
Met herde grooter solempniteit
[Ontfaen], ende met behoorliker serimonien;
Ende hi heeft hem, dat derric lien,
Behoorliken eet daer toe ghedaen,
Dien si hebben van hem ontfaen,
Dien een greve, si u bekant,
Van Henegouwe, Hollant ende Zeelant
Tsier eerster ontfankenessen, sijts ghewes,
Van rechte sculdich te doene es.
Ende tridderscap ende leenmanne desghelijc
Ende raet der steden zamentlijc,
Ende die inghesetene met weerdicheit
Van den drien landen voorseit
Hebben hertoghe Janne, wilt verstaen,
Ghehult ende lieflijc ontfaen,
Ende hebben hem eet ghedaen ende hulde
Van trouwen, als si van rechter sculde
Haren heere [sculdech] waren, hout u daer an,
Te doene, als een wettich man,
Vooght ende momboor in rechter trouwen
Van harer gheborener erfvrouwen.
Ende desghelijcs es ooc daer na
Die voorseide Vrouwe Jacoba
In den steden ende lande, dit versinne,
Van Brabant, als Vrouwe ende hertoghinne
Ende wetteghe ghesellinne met groter eere
Van den hertoghe haren heere
Met crucen ende vanen, verstaet den sen,
Ende met devoten processien
Ende anderen solempniteiten voorwaer
Inghehaelt ende ontfanghen daer,
Als men in Brabant pleeght, dit versinne,
Ierstwerf tontfane een hertoghinne.
Ende si heeft als hertoghinne voorscreven
In elc clooster een provende ghegheven
Al Brabant dore sekerlijc;
Ende hertoghe Jan heeft desghelijc
Als wettich momboor, ic seker ben,
Provenden ende beneficien
Al omme ghegheven, wilt ghevroeden,
Die ter collatien of dispositien stoeden
Sgreven van Henegouwe ter waerhede,
Van Hollant ende van Zeelant mede.
Hi heeft ooc binnen den lande voorseit,
Als greve ende heere der heerlicheit,
Gheset ende ontset na sijn maniere
Casteleine, scepenen, officiere,
Ende al tgone ghedaen, met corten woorde,
Als eenen prince toebehoorde.
Ende in al des vore es ghelesen,
Hebben si hem ghehoorsam ghewesen
Als ondersaten in allen keere
Sculdich te doene sijn haren heere.