Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LXII.

Van den huwelike tusschen hertoge Janne van Brabant en vrouwe Jacoppen van Hollant.

Hierna, int vorseide iaer
XIIII^c XVII, dits waer,
Na costume van scrivene, si u bekant,
Van den hove van Brabant,
Heeft hertoghe Jan, dat segghic di,
XXIII der maent januari
Ghesonden heerlijc aen Mier Vrouwen
Inghelbrecht greve te Nassauwen,
Heere te Leck, te Breda desghelijc,
Heere Heinrijc van der Lecke, heere tot Heeswijc,
Ende Willeme Blondeele daertoe meere,
Die van Grevillier was heere,
Sijn raedsliede te dien stonde,
Ende van Dynter meester Emonde
Sinen secretaris, hoort hier nare,
Om te tracteerne met hare
Ende metten huwelijc voort te varen,
Na tbegrijp, hoordic verclaren,
Van eener instructien die si
Met hen hadden, soe seide men mi.
Ende daer na, doe ic u ghewach,
In februario den tiensten dach,
Sant weder die hertoghe van Brabant
Tot der voorseider Vrouwen van Hollant
Den voorseiden greve van Nassouw, dat wet,
Ende heere Heinrijc van Berghen met,
Heere van Grimberghen ende van Melijn,
Ende heere Heinrike, eenen ridder fijn,
Van der Lecke sonder begheven,
Ende Willeme Blondeel voorscreven.
Ooc sant hi met hen ter selver stont
Meester Jan Bonte ende meester Emont
Van Dynter, hoort mi verclaren,
Die met sinen brieven ghemechticht waren
Van shertoghen weghen volcomelike
Van den voorseiden huwelike,
Om met hare sonder failleren
Te sluten ende te termineren.
Ende daerna, hout u daer an,
In de maent van meerte, trac hertoghe Jan
Van Brabant in sijns selfs persoone
Met heerliker gheselscap scoone
Van greven, baenrotsen, edelen,
Ridderen, knechten, ic seker ben,
In Hollant, doe ic u ghewach,
Ende quam opten achsten dach
Van meerte in des greven Haghe.
Si ghinghen te rade in den andren daghe.
Daer was die bisscop van Dornike
Die proost van S^t Donaes derghelike,
Meester Symoen was daer mede
Van Fremelles, dits waerhede,
Doctor in loye, hout u daer an,
Ambassiatuers van hertoghe Jan
Van Bourgognen, si u bekant,
Die raetsliede shertoghen van Brabant,
Ende die raetsliede daer mede
Mier Vrouwen van Hollant, ende der stede
Ghedeputeerde, die daer waren,
Van Brabant, van Henegouwe twaren,
Van Hollant ende van Zeelant,
Ende visenteerden al te hant
Die bulle van der dispensatien
Entie copie van der revocatien,
Daer af Minen Heere van Brabant
Noch Mijnder Vrouwen van Hollant
Bulle noch vidimus auctentijc
Ghetoont en was. Zeere ripelijc
Overdachten si ende woeghen seere
Die sorghen ende lasten in allen keere
Ende inconvenienten, hoort mi verclaren,
Die in der zaken gheleghen waren,
Ende daer af comen mochten na oft bi.
Ende ten utersten soe sijn si
In haren rade samentlike
Overcomen eendrachtichlike,
Dat Mijn voorseide Heere van Brabant
Ende Mijn Vrouwe van Hollant
Des anderen daeghs, verstaet ende hoort,
Ter eeren Gods souden varen voort
Metten huwelike, doe ic ghewach.
Des donderdaeghs, opten X^sten dach
Der maent van meerte, dat elc versta,
Hebben hertoghe Jan en Vrouwe Jacoba
Belieft ende gheapprobeert
Die dispensatie vore vercleert;
Ende uut crachte van diere, soe hebben si
Opten selven dach, dat segghic di,
Des avonts na completen tswaer
Int slot van sGrevenhaghe daer
Met behoorliken woorden sterke
Na forme van der heilegher kerke
.....
.....
Hier waren ieghenwoordich ende bi
Vrouwe Margriete, dats sonder si,
Van Bourgognen, des sijt vroeder,
Miere voorseider Vrouwen van Hollant moeder,
Hertoghe Adolf van den Berghe eerbaerlike
Ende die bisscop van Dornike,
Die proost van Sinte Donaes, dats waer,
Van Brugghe; ende ooc waren daer
Greven, vrien, verstaet den sen,
Baenrotsen, edelen, ridderen
Ende knechten in grooten ghetale,
Ende die ghedeputeerde te male
Van den voorseiden steden van Brabant,
Van Henegouwe, van Hollant ende Zeelant.
Ende den eersten nacht, dits waer,
Besliep die hertoghe Miere Vrouwen daer
Int voorseide slot van sGrevenhaghe;
Ende over een maent van dien daghe,
Int iaer van XVIII^c, hoore die wille,
Opten X^sten dach van aprille,
Soe trouden Mijn Heere, Mijn Vrouwe voorseit
Malcandren met grooter solempniteit
In handen des dekens, verstaet dit wale,
Van der kerken collegiale
Ofte cappellen, dit was waer,
Int slot van sGrevenhaghe aldaer.
Hier was Mijn Vrouwe haer moeder bi
Ende die borchgreve van Leiden sonder si,
Heer Heinric van der Leck te waren,
Beide dat si ridderen waren;
Willem Blondeel, en lieghe u niet,
Die heere van Grevilleer hiet,
Ende Willem van den Berghe, si u bekant,
Die heere van Orbays was ghenant;
Die vrouwe van der Hameiden eerbaerlike
Entie vrouwe van Sinte Mertens dike,
Die vrouwe van Steenkerke, dats certain,
Ende die ioncfrouwe van Lalaing;
Die ioffrou van den Poele, dits claer,
Entie ioffrou van der Does, dits waer,
Ende meer heeren, vrouwen, ioffrouwen
Ende goeder liede in goeder trouwen
Waren daer thuwelijc ghesciede,
Beide edele ende onedele liede.