Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LVIII.

Hoe die dispensatie van den huwelic tusschen hertoghe Janne en vrouwe Jacob[a] gheschorst wart.

Hertoghe Jan van Beieren, sijt seker das,
Uut Hollant te Ludeke ghetoghen was,
Daer hi enen tijt es bleven.
Maer int selve iaer, vindic bescreven,
XIIII^c XVII, dat segghic di,
In die maent van septembri,
Sciet hi van Ludeke voor waer,
Ende nie sint en quam hi daer,
Ende sijn vaert nam hi te recht
In die stat van Dortrecht,
Daer hi inne was ghelaten saen
Ende ghehult ende ontfaen.
Hoe wel dat huwelijc vore vercleert
Tusscen hertoghe Janne was ghetracteert
Van Brabant ende siere nichten tswaer
Van Hollant, als ic u dede verclaer,
Bi wetene, wille, consente ende raet
Hertoghe Jans van Beieren, dat verstaet,
Ende hoe wel hi offerde met woorden scoone
Te Constans te ridene in sijns selfs persoone
Om dispensatie te wervene ghereet,
Ghelijc als dat voorscreven steet:
Heeft hi nochtan in corten stonden
Enen abt ende enen ridder ghesonden
Uut Beieren te Constans met verdicheden,
Daer si van sinentweghen opdeden
Ende in sinen name hebben bescreven
Een supplicatie overghegheven
Den cardinalen, dit was waer,
Int selve voorscreven iaer
XIIII^c seventiene, dat segghic di,
XXIII daghe in septembri,
Om te belettene, si u bekant,
Dat metten hertoghe van Brabant
Ende met Vrou Jacoppen vore vercleert
Niet en worde ghedispenseert.
Maer want die heeren, die cardinale,
Hen daertoe en keerden niet te male,
Soe hebben dabt entie ridder twaren
Die supplicatie laten varen,
Ende hebben een ander, dat segghic di,
Supplicatie gheworven, die si
Hebben overghegheven, dits waer dinc,
In den name van den Roomscen coninc.
Die vervolghden si ernstelijc te male
Beide voor die voorseide cardinale,
Ende ooc onder alle die natien
Van der heilegher concilien,
Om te belettene daer met
Die dispensatie, dat ghijt wet.
Die ambassiatuers, verstaet den sen,
Wesende in der concilien
Des hertoghen van Brabant onghecesseert
Hebben daer ieghen gheopponeert
Alsoe verre ende alsoe wale,
Dat die heeren, die cardinale,
Entie natien van Vrankerike
Daer op antwerden samentlike
Dat die eisch des abts openbare
Ende des ridders onredelijc ware;
Des en wouden siere niet toe doen een twint.
Maer die ander IIII natien, dit versint,
Hebben ghedeputeerde ghegheven
Om hem van der saken voorscreven
Te informerene wel ende claer.
Dus soude die dispensatie daer
Ghescorst bliven eenen termijn,
Tot die paus ghecore soude sijn.
Dit condichden dambassiatuers te hant
Hertoghe Janne van Brabant
Haren heere, sonder begheven,
Met haren brieven te Constans ghescreven
In die maent, doe ic ghewach,
Van october, den dertienden dach.