Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LVII.

Hoe doirdinancie der drie staten op tregiment hertoghen Jans ghebroken wert.

Als hertoghe Jan, des sijt ghewes,
Weder van Biervliet comen es
Te Bruessel int stat sonder verlaet,
Doe wert hem noch sijn staet
Onderhouden met eerbaerheit
Na der ordinancien voorseit
Bi den drien staten ghemaect, doe ic ghewach,
Opten neghenentwintichsten dach
Van januario lest voorleden.
Na welker ordinancien, als wi vore zeden,
Hi gheenrehande officiere
Setten en mochte in gheender maniere,
Noch brieve verleenen, verstaet den fijn,
Metten grooten zeghele sijn,
Dan bi rade, hoort mi bedieden,
Van eneghen vieren siere raetslieden,
Die in die brieve moesten ghetekent wesen,
Als ghi voren hebt ghelesen.
Jeghen dese ordinancie dan
Maecte de voorseide hertoghe Jan
Willeme van Assche, ic segghe u dat,
Sinen amman te Bruessele int stat,
Ende verleende hem daeraf tsiere lieve
Sijn bezeghelde open brieve
XI in oeghst, dat segghic di,
Sonder iemande van sinen rade daer bi
Gheteekent te wordene, ende nochtan
Wert Willem van Assche als amman
Des ander daeghs opten XII^sten dach
Te Bruessel ontfaen, daert menich sach,
Voor scepenen, daer hi dede sinen eet.
Cort daer na aenveerde ghereet
Hertoghe Jan selve tregement
Sijns lants, sijns staets, ende al tbewent.
Dus wort ghebroken mids dit beleit
Dordinancie der drie staten voorseit
Die was ghemaect, ic seit u so,
Neghenentwintich in januario,
Als zi omtrent VII maent tot desen
Onderhouden hadde ghewesen.