Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LVI.

Van hertoghen Jans ambaxiatours die inder concilien van Constans laghen.

Hertoghe Jan, dat ghijt verstaet,
Hadde al eer, vore dit tractaet
Van den huwelike gheconfirmeert al vore
Al tgone dat die ambassiatore
Wilen hertoghen Anthonijs, sijns vader,
In der heilegher concilien te gader
Van sijns vader weghen ende heeren
Te Constans hadden ghedaen tsier eeren;
Ende want hi hem in doeghden voor waer
Den voetstappen pijnde te volghene naer
Sijnre vorderen, heeft hi tien stonden
In der concilien te Constans ghesonden
Eerweerdeghe clerke van rechte:
Van den Stocke heere Lambrechte,
Doctor in decreten, sijt seker das,
Die prior van Bertrez ooc was,
Anselmus Smeeds, deken, wilt merken,
TAntwerpen in Onser Vrouwen kerken,
Godevaerde van Zichenen, hoort wat ic spreke,
Deken van Sinte Peeters te Beke,
Beide in loye ghelicentieert;
Heer Reineren van Arnhem, si u vercleert,
Canonic te Ludike, zijt zeker das,
Ende Peetren van Bruessele, die was
Canonic te Constans tier selver tijt
Ende Lonise van Baest, des seker sijt,
Bacheleer in theologien.
Ende na dat die Roomsce, hoordic lien,
Ende Honghersce coninc, daer wi af seiden,
Van der stat van Ludike was ghesceiden
Ende te Constans weert ghetoghen,
Ordineerde die heere vermoghen,
Hertoghe Jan van Brabant,
Sijn ambassiaet te hant
Aen den Roemscen coninc recht,
Te wetene den bisscop van Atrecht,
Meester Peetren Canchon ter waerhede,
Meester Janne Papiot ende daer mede
Meester Janne Bonten, verstaet die dinc,
Om den voorseiden Roomscen coninc
Van sinentweghen met begheeren
Sinen dienst te presenteeren,
Ende al noch te versueken tot dien
Rekeninghe van allen dien
Datti van den Roomscen rike, dits claer,
Hielde ende sculdich te houdene waer;
Ende soe verre si conden, hebbic vernomen,
Metten Roomscen coninc overcomen.
Na begrijp eender instructien bescreven,
Die welke die hem was ghegheven,
Soe mechtichde hem hertoghe Jan dier dinc:
Van sinentweghen den Roomscen coninc
Tofferen ende toe te segghen met loste
Te dienene te sijns selfs coste
Twee maende lanc, ic seker ben,
Met twee of drie hondert glavien.
Welke ambassiatuers met staden
Haer bootscap aen den coninc daden
Te Constans wiselijc met voorraet;
Maer die coninc en wilde gheen tractaet
Aengaen, mids dat, si u verclaert,
Haer macht was ghelimiteert
Na begrijp, verstaet den sin,
Van der voorseider instructien.
Als nu dat tractaet dat ic vore las
Van den huwelike ghededinght was,
Overdraghen, ghesloten, heeft te hant
Hertoghe Jan van Brabant
Sijn ambassiatuers, ic seker ben,
Met volcomender procuratien
Ghemechticht, die voorseide wise mans,
Van den stoele van Roome of, te Constans,
Van der heilegher concilien na sijn begheren
Dispensatie te impetreren
Daer hem met gheoorlooft worde te waren
Metten huwelike voort te varen
Tusscen hem, dat elc versta,
Ende die voorseide Vrouwe Jacoba,
Niet wederstaende, hoordic oorconden,
Dat zi ten tweesten grade bestonden;
Want si beide, verstaet den fijn,
Suster ende brueder kinder sijn,
Ende niet ieghenstaende ooc mede
Dat si bestonden ten derden lede
Van swagherscape, dits claer besceit;
Want die dolphijn van Viennen voorseit,
Der Vrouwen Jacoppen ierste man,
Ende van Brabant hertoghe Jan
Bestonden elcanderen alsoe naer
Van maechscape, ten derden, dats waer.
Die ambassiatuers, soe saen
Si die procuratie hadden ontfaen,
Aerbeiten si ghetrouwelijc in der bederven
Om die dispensatie te verwerven.
Maer si en condense sekerlijc
Niet ghecrighen lichtelijc;
Mids dat van Beieren hertoghe Jan
Ende daer die edel man,
Die Roomsce coninc, dat beweerden,
Ende daer ieghen opponeerden:
Soe ic namaels, hebbics gheval,
Claerlijc u bescriven sal
Ter plaetsen daer dat sal behooren.
Maer ic moet anders scriven vooren.