Brabantsche yeesten. Les gestes des ducs-de-Brabant par Jean de Klerk d'Anvers (3 delen)

LIII.

Van der ordinantien ghemaect op des hertoghen staet van synder herberghen.

Als nu die XI persone voorseit
Ghehat hadden dauctoriteit
Een iaer lanc of daer omtrent
Van hertoghe Janne ende tregement,
Ende van sinen lande daer mede,
Soe bevonden die goede stede
Dat men den staet van den hertoghe Jan,
Alsoe hi was ghenomen an,
Niet en soude moghen vuechlijc
Continueren; want claerlijc
Bevant men int openbare,
Dat die cost binnen dien iare
Van der herberghen liep sonder hoonen
Meer dan XXXV dusent cronen;
Ende mids dien hebben alte hant
Die zeven hooftsteden van Brabant,
Ende die stat van Tricht met hen
Den hertoghe Janne, ic seker ben,
Haren heere daer af gheadverteert,
Ende hem haer avijs vercleert
In een cedulle wel bescreven,
In ghescrefte overgegheven;
Soe dat bi den drien staten, hoort mi saghen,
Gheraemt wert ende overdraghen,
Dat tlant van Brabant sonder wanc
Hertoghe Janne haren heere vijf iaer lanc
Elcs iaers tsier cost weert gheven soude
XVI^m fransce cronen van goude,
Om dat men daer met sonder verlaet
Houden soude sinen staet.
Ende binnen dier tijt, hoordic ghewaghen,
Daer hi dus ionc noch ware van daghen,
Met sinen renten, forfaiten, vervallen,
Soudemen sijn slote ende renten met allen
Ende heerlicheiden, hoordic verclaren,
Die te vele[n] inden becommert waren,
Ontlasten, ontcommeren, los ende vri
In sijn handen stellen, soe dat hi
Op sijns selfs renten properliken
Ende domainen mocht heerliken
Ende princeliken staet houden voort,
Als eenen hertoghe toebehoort
Van Brabant - als daden hier te voren
Sijn edele vorders hooghgheboren -
Op sekere ordinantie, met goeder maten,
Daer af bi den voorseiden drie staten
Gheraemt was met goeder stade,
Ende bi den hertoghe ende sinen rade
Ghesloten; behouden daer in te waren
Oft den hertoghe binnen den vijf iaren
Gheliefde te hebbene tregement
Van sinen state, ende tbewent
Sijns lants, siere zaken verre oft bi
Bi hem selven te besorghene: dat hi
Dat sal moghen doen openbare,
Onbegrepen binnen dien iersten iare,
Soe verre hi dat condighde, mooghdi hooren,
Den drien staten een iaer te vooren;
Ende van dan voort souden die drie staten
Onghehouden sijn ende verlaten
Van den XVI^m cronen voorscreven
Des iaers tot siere cost te gheven
Van siere herberghen, alst voorseit es.
Dit was ghesloten, des sijt ghewes,
Ende overdraghen met ripen sinnen
Int iaer voorscreven te Bruessele binnen
XIIII^c XVI, doe ic ghewach,
In januario den XXIX^sten dach,
Na costume van scrivene, si u bekant,
Van den hove van Brabant.
Dus sijn die XI ghecoorne voorscreven
Des hertoghen Jans rade bleven.
Maer si en waren daghelijc
Niet te hove, noch desghelijc
En hadden si gheen wedden meere,
Si en waren ontboden; ende mijn heere
Hertoghe Jan in gheender maniere
En mocht stellen gheen officiere,
Noch open brieve, dits waerheit fijn,
Verleenen metten zeghele sijn,
Daer en moesten te minsten tot desen
Vier raetsliede bi gheteekent wesen.
Dese ordinantie hielt mijn heere
VII maende ende niet veel meere,
Ende doen aenveerde hertoghe Jan
Selve tregement, hout u daer an,
Sijns staets, sijns lants, ghelijc als dat
Hierna vercleert sal werden bat.