Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XLIX.

Hoe hertoghe Jan tregiment van den XI persoenen confirmeerde ende wat zy daden.

Als hertoghe Jan, des sijt ghewes,
Alomme ghehult ende ontfanghen es,
Confirmeerde hi dordenantie algader,
Die onlancs na die doot sijns vader
Die drie staten van Brabant,
Overdraghen hadden, si u bekant,
Ende ghemaect eendrachtichlijc;
Ende alle tghene desghelijc,
Dat die XI persoone, wel gheraect,
Die bi den drie staten waren ghemaect,
Ende tot sinen besorghe ghecoren
Ende regemente, als ghi mocht hooren,
Ende sijns lants, wilt verstaen,
Tot dier tijd toe hadden ghedaen;
Houdende dat van weerden al,
Ghelijc ocht hijt groot ende smal
Selve ghedaen hadde ende gheordineert.
Voort onthielt hi onghecesseert
Die XI persoone ten rade sijn,
Ende met hen, dats waerheit fijn,
Meester Janne Bont in den rechten beide
Licentieert, dit es waerheide.
Dit ghesciede int selve iaer alsoe,
Viere ende twintich in februario,
Na costume des scrivens, si u bekant,
Van den hove van Brabant.
Dese XI regeerders met goeden attente,
Binnen den tide van haren regemente,
Die wile si sonder commissie, alleene
Uut bevele van den staten ghemeene
Regeerden, dat dit elc versta,
Ende bi Commissien daer na
Van hertoghe Janne, als es verclaert:
Hielden meneghe dachvaert
Metten Ludekeren minnelijc,
Metten Gelderschen, ende desghelijc
Metten greve van Vernenborch met weerden,
Van Moerse ende van Sarweerden,
Ende metten greve van Blanckenhem,
Ende meer andere onder hem,
TAken, te Tricht, hier op merke,
TSintruden, te Halen, te Herke,
TsHertoghenbossche met wijsheden,
Ende tanderen plaetsen ende steden;
Alsoe dat si in allen siden
Tlant binnen haren tiden
Met voorsienegher wijsheden
Hielden in rasten ende in vreden.