Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XLVII.

Van der dachvaert te Tricht, en wes daer tusschen den lande van Brabant ende van Luydeke overdraghen wert.

Op dat die lande voorghenant
Van over Mase ende van Brabant
Te voorder van last ende van scaden
Mochten verhuet sijn ende ontladen,
Wort ten vervolghe opgheheven
Van den XI regeerders voorschreven
Een dachvaert te Tricht altehant,
Tusscen hertoghe Janne van Brabant
Ter eender siden, ic seker ben,
Ende hertoghe Janne van Beieren,
Elect van Ludeke tien tiden
Ende sinen vrienden ter ander siden.
Tot dier voorseider dachvaert
Van der staten weghen ghesonden waert
Van Brabant, dat verstont ic soe,
Mijn heere die abdt van Tongherloe;
Heer Heinric van Berghen, dats waerheit fijn,
Van Grimberghen heere ende van Melijn,
Ende van Schoenvorst ioncheere Jan,
Borchgreve van Montjouw, ende voort an
Van Heverle heere her Heinrijc,
Gielis die Rike derghelijc,
Commoyngmeester, dit verstaet,
Der stat van Lovene, ende als raet
Der selver stat, dit wilt ghelooven,
Heinric Van der Borchoven.
Daer waren van Bruessele der stede
Jan Mennen, Ghysbrecht Pipenpoy mede,
Schepenen beide, ende met hen
Jan van Coudenberghe, verstaet den sen,
Ende Jan de Hertoghe, die beide te waren
Raetsliede der stat van Bruessele waren.
Van Antwerpen soe waren daer
Heer Gheldolf Van der Zennen, dats waer,
Riddere, ende Van den Houte Jan,
Scepenen beide, hout u daer an.
Heimeric Groy die was daer met
Als scepene van den Bossche, dat wet.
Meester Jan Bont, zi u vercleert,
In beiden den rechten licencieert;
Meester Peeter de Beckere, hoordic verclaren,
Die meesters der rekencamere waren;
Ende als secretarius, doe ic u cont,
Van Dynter, meester Emont.
Ende van weghen soe waren daer
Mijns heeren van Ludike, dat es waer,
Op die selve dachvaert ghesonden
Heer Hacke te dien selven stonden
Van Outhoesden, die was
Tresorier, sijt seker das,
Mijns heeren van Ludike, verstaet dit stuk;
Heer Jacob Groy, heer Arnt Buck
Canonic ende zeghelare int perlot
Van Ludeke ende heer Jacob chabot,
Meiere van Ludeke, hout u daer an,
Ende van den Roetsen heere heer Jan,
Vooght van Fleron, scepen mede
Van Ludeke, der goeder stede;
Als rentmeester was daer met hem
Heer Diederic van Hoekelem:
Sijn raetsliede alle. Ooc waren daer
Van des Capittels weghen, dits waer,
Heer Wouter van Mosmael ter selver saken,
Van Henegouwe archidiaken;
Heer Gielis Wijnants, sijt seker das,
Heer Peeter Van Steine, die proost was
Tot Eycke; die beide, hoordic verclaren,
Canonike van Ludike waren.
Van der stat weghen waren daer
Van Ludike, dits zeker waer,
Willem Voirle ende Heinric Coene,
Scepenen beide ten selven doene.
Bi desen commissarissen
Ende ghedeputeerden met hen,
Wort overdraghen, sonder si,
Seventien daghe in decembri,
Ende ghesloten eendrechtichlijc daer,
Int voorscreven Ons Heeren iaer
XIIII^c XV, dat men over al
In den lande van Brabant ghebieden sal,
Ende van over Mase, sijts vroet,
Beide op lijf ende op goet,
Dat, uten lande ghenoemt hier vore,
Niement daer uut, daer in, daer dore
En scadechde, dit was goet ende scoon,
Den lande van Ludike noch van Loon;
Ende tselve men ghebieden sal
Int lant van Ludike overal
Ende van Loon, des sijt vroet,
Dat niement, op lijf ende op goet,
Uten selven lande ghenoemt vore,
Weder daer inne noch daer dore
En scadichde tot enegher stede
Den lande van Brabant; noch ooc mede
Van over Mase desghelike.
Ende waer men bevonde, arm of rike,
Binnen eneghen lande van desen,
Jemene daer scade af ware gheresen
Den anderen, enichsins, groot of smal:
Dat men dien aentasten sal,
Vanghen, ende houden altehande,
Als oft ontsegghende viande
Sheeren waren, dit wilt verstaen,
Daer si onder worden ghevaen;
Ende dat die amptliede onverbolghen,
Ende ondersaten selen moghen volghen
Van den enen lande in ander palen
Haer viande; vervolghen ende verhalen,
Houden ende bescudden haer have;
Ende die amptliede selen daer ave
Ende ondersaten, hoort mi verclaren,
Des lants, daer si vervolght waren,
Den ghenen die dit vervolgh deden,
Bistaen met ghetrouwicheden,
Om die mesdadeghe te hant
Te vanghene, ende in zekeder hant
Ten naesten gherechte te leveren saen,
Daer onder dat si worden ghevaen,
Om daer over te worden een voor al
Gherecht, alsoet behooren sal.