Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XLVI.

Vanden elleven die totten regiminte hertogen Jans van Brabant ghestelt woorden.

Na dit verbont altehant
Die drie staten slants van Brabant,
Entie edele ende die steden met
Der lande van over Mase, dat wet,
Hebben verstaen met snellen-keere,
Om hertoghe Janne haren heere,
Die doen ter tijt, sijt seker das,
Omtrint XIII jaer out was,
Een goet regiment, sonder verlaet,
Ende enen tameliken staet
Te ordineerene, alsoe dat hi
In eeren mocht leven. Maer want zi
Die persoonen niet en conden overcomen,
Die daertoe souden sijn ghenomen
Met samentliker eendrechticheit:
Soe hebben hen die state voorseit
Ten utersten alsoe bedacht:
Die auctoriteit ende macht
Over te ghevene in de hant
Den VII hootsteden van Brabant,
Te wetene Lovene, Bruessele mede,
Antwerpen, Bossche, Thienen, der stede
Leeuwe, ende Nivele, om sonder verlaten
Te noemen, uut den drien staten,
Die tbesorch ende tbewint
Hertoghen Jans ende tregemint
Van sinen lande souden draghen.
Mids dien hebben, sonder verdraghen,
Die ghedeputeerde, sonder begheven,
Van den VII steden voorscreven
XI persone ghenoempt, met enen consente,
Toten besorghe ende regemente:
Twee prelaten, drie baenrotsen, twee ridderen,
Ende vier gheborteghe poorteren,
Als met namen, verstaet den sen,
Heere Janne van Hafflighem,
Ende van Tongerloo heere Janne,
Twee abdte, twee wise manne;
Ende heere Thomase met hen,
Heere te Diest ende te Sichenen,
Borchgreve van Antwerpen alsoe wale;
Ende heere Janne heere van Wesemale
Ende van Faleys, si u bekant,
Erfmarscalc van Brabant,
Ende heere Heinrike, in trouwen fijn
Heere van Grimberghen ende van Melijn,
Baenrotsen alle samentlike;
Ende van Heverle heere Heinrike,
Van Brabant erfcamerlinc,
Ende heere heer Jan, dits ware dinc,
Van Huldenberghe, twee riddren vri.
Ooc was daer ghenomen bi
Raisse van Graven, van Maleine heere,
Woonende te Lovene, ende daer toe meere
Reinere Moers, van Bruessele der stat,
Ende van Antwerpen, verstaet dat,
Claes van Steelant sekerlijc,
Ende van Weerthusen Heinrijc,
Van sHertoghenbossche; ende na sijn doot
Wort ghecoren, segghic u bloot,
Een ridder, ghestelt in sijn stat,
Heer Diederic de Roevere. Ende na dat
Dese voorseide elve met consente
Ghecoren waren ten regimente
Ende ten besorghe, des sijt ghewes,
Des lants van Brabant, soe voorseit es:
Namen sijt ane alsoe wel,
Sonder commissie ocht ander bevel,
Tbesorch te hebbene ende tbewent
Van hertoghe Janne, ende tregiment
Van sinen lande. Ende sonder verlaet
Ordineerden zi hem enen staet
Van sijnder herberghen ter stont;
Ende si daden, dat si u cont,
Alle zaken van doen voortan,
Tot dat ontfanghen was hertoghe Jan,
Onder haers selfs zeghele, zonder si;
Ende desghelijc ontboden zi,
Alst hen oorbore dochte, te hant
Die drie state van Brabant.
Voort daden si alle zaken daer neven
Dienende ten regimente voorscreven.
Ooc daden si maken, dat segghe ic di,
XXV ende XXVI in novembri,
Een scoon inventarijs
Van allen den juweelen, sijts wijs,
Ende cleenoden, die si vonden daer
In der capellen ende elswaer
In de cameren, si u bekant,
Te Coudenberghe op thof van Brabant;
Ende desghelijcs van dat si vonden
Te Willem Blondeels huse tien stonden,
In cameren, in kisten, hoort mi verclaren,
Die, als ghi hoordet, bezeghelt waren
Van den greve van Nassouw, dits waerhede,
Ende van heer Heinric Van Berghen mede,
Bi bevele der staten van Brabant;
Van welken inventarijs tehant
Die steden van Brabant te harer vramen
Copien te henwaerts overnamen.