Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXXVIII.

Van den heere van Diest ende Heinrijke Poppe.

Als die Roomsche keiser vermoghen
Van Aken opweert was ghetoghen,
Soe es Thomaes daer na saen
Heere van Diest, wilt mi verstaen,
Bi sinen heeren ende maghen beden
Ende ooc van den goeden steden
Lovene, Bruessele ende Antwerpijn,
Die alle met goeder trouwen fijn
Aerbeiten in menegher wijs
Aen den hertoghe Anthonijs,
Die te harer beden wort beraden
Dat hi te gracien ende te ghenaden
Nam van Diest den goeden heere,
Daer hi langhe op herde zeere
Vertorent was ende zeere verbolghen,
Mids redenen die hier na volghen.
In tiden voorleden, sijt seker das,
Dat Diederic Plissis rentmeester was
Des heeren van Diest, die woude ontfaen
Meer dan hi voortijts hadde ghedaen
Van sheeren renten, sijt vroet hier af,
Meer dan men den hertoghe gaf
Voor den ouden grooten; ende als dat
Niet en conde die goede stat
Van Diest den rentmeester onderwisen,
Noch haren heere, in gheender wisen,
Dat hi hen des woude verdraghen:
Soe moesten sijt van noode claghen
Den hertoghe ende sinen rade;
Ende vervolghdent alsoe drade
Ende alsoe langhe, dat verstaet,
Dat die hertoghe sonder verlaet
Den heere van Diest beval de dinghe,
Dat hi niet meer en ontfinghe
Voor den ouden grooten teenegher stede,
Dan die hertoghe selve dede,
Na die ordinantie van den lande.
Hoe wel dat dese voorghenande
Saken worden vervolght, mids dat,
Bi overdraghe van der stat
Van Diest ghemeinlijc, sonder blijf,
Hadde daer af nochtan tmeest bedrijf
Een eerbaer man, des seker sijt,
Heinric Poppe, die te dier tijt
Scepen was: om dit vervolghen
Wert op hem wel zeere verbolghen
Die heere van Diest vore vertaelt.
Hier na ghevielt dathi ghehaelt
Wert om te comen, hoort hier abuus,
Bi sinen ghesellen opt raethuus;
Ende als hi uut sinen huse quam,
Soe ic die waerheit claer vernam,
Om te gane ten raethuse weert:
Soe wert hi haestelic aenveert
Van Janne den Jode herde saen,
Ende Janne van Tongheren, wilt verstaen,
Die alle beide, hoort mi verclaren,
Des heeren van Diest vorsteren waren;
Die welke met onghenaden groot
Heinrike Poppen sloeghen doot.