Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXXVI.

Hoe hertoghe Anthonijs een notabele ambassiaet aen den coninc van Hungheren heeft ghesonden, en wat sij daer daden.

Desen achtervolghende, sant
Hertoghe Anthonijs van Brabant
Toten coninc van Hongheren alsoe
Minen heere den abdt van Tongherloe,
Inghelbrecht greve te Nassouw, dit versta,
Heere te Leck ende te Breda;
Willem greve te Zeine, als bode,
Heere te Sinte Aechten Rode;
Heer Heinrike van Berghen, sijt seker das,
Die heere te Grimberghen was,
Ende drossate van Brabant; en met hem
Broeder Goeswinne, prioer te Zelem
Van den Carthuisen, bi Diest, op die vaert;
Van Zichenen meester Godevaert:
Dese was deken, daer ic af spreke,
Der kerken van Sinte Peeters te Beke;
Ende meester Ian Bont, hier op merke,
Canonc van Sinte Goedelen kerke
Te Bruessele, ghelicenceerde
In beiden den rechten, ghedeputeerde,
Sijn raetsliede te dier stont;
Ende met hem meester Emont,
Sijn secretaris; die waren vast
Met eenre instructien ghelast,
Om na die instructie, dit verstaet,
Te slutene alsulken tractaet,
Als die greve van Savoyen van der dinc,
Tusschen den voorseiden coninc
Ende hem, onlancs hadde ghemaect.
Welke ambassadeurs welgheraect
Quamen, doe ic u ghewach,
In oeghste, den XV^sten dach,
Te Covelens, si u verclaert,
Daer die coninc van der dachvaert,
Die ghehouden was te Spiere,
Comen was; ende hebben schiere
Den coninc van Hongheren vore vercleert
Haer brieve aldaer ghepresenteert,
Ende bi meester Jan Bonten saen
Hertoghen Anthonis onschout ghedaen,
Dat hi in sinen persoon, dits waer,
Niet comen en es; ende offerden daer
Den voorseiden coninc in alder wijs
Den dienst van hertoghe Anthonijs.
Haren last daden si daer nae op
In presencien van den eertsbisscop
Van Mens, ende des elects vermoghen
Van Coelne, ende des hertoghen
Van Heidelberghe Lodewijc,
Hertoghen Reynouts derghelijc
Van Ghelre, ende des mercgreven
Van Baden; ende daer was neven
Greve Philips van Nassouw. Voort,
Na dat die coninc hadde ghehoort
Haren last, soe liet hi viere
Poente bliken, in der maniere,
Daer hi af was gheinformeert,
Ieghen den hertoghe vore vercleert.
Teerste was, des seker sijt,
Dat hi niet gheduwarijt
Miere vrouwen en hadde, des sijt vroeder,
Soe hijt den coninc sinen broeder
Ghelooft hadde, als vore vercleert.
Tander, dat hi hadde begheert
Van den ridderscape ooc mede
Van Lutzenborch erffelike eede.
Tderde poent hi dus verclaerde:
Dat hi van Eltere heer Huwaerde,
Die bi den coninc van Behem daer
Een hootsman ghemaect waer,
Ontset hadde: twelke was
Ieghen die voorweerde, sijt seker das,
Die tusschen sinen broeder wijs
Van Behem ende hertoghe Anthonijs
Ghemaect waren, hoort mi vercleeren.
Tvierde, dat enighe siere dieneren
Van sinen lieden, verstaet den fijn,
Int lant van Lutzenborch hadden ghesijn,
Ende des hertoghen amptluden
Gheweighert hadden sinen luden
Die slote te openen, dat openbaer
Ooc ieghen die voorweerde waer,
Ende ieghen den inhout, dits waer dinc,
Die hem sijn broeder, die coninc,
Verleent hadde ende ghegheven.
Op welke IIII poente voorscreven
Antwerden die ambassaduere,
Dats die coninc wel ter cuere
Te vreden was ende content;
Maer hi en woude aldaer present
Met hem niet sluten, hoort dit verclaren,
Om datse volmachtich niet en waren,
Maer na een zekere, als vore vercleert,
Instructie waren ghelimiteert.
Aldus begheerde die coninc te hant,
Op die vier poente voorghenant,
Dat binnen eender maent na tgone,
Die hertoghe in sijns selfs persone
Bi hem quame, ende woude sijn
Teenegher plaetsen opten Rijn.
Ocht hi des niet ghedoen en conde,
Dat hi alsdan eneghe sonde
Van sinen rade, volcomelijc
Ghelast, bi den coninc rijc,
In der consilien te Constans;
Ende dat die hertoghe noch sijn mans
Heer Huwaerde, noch sijn helpeeren,
Binnen dier tijt en soude deeren
Noch orloghen, dit ghevroede;
Maer daer en binnen haers selfs goede
Soude laten ghebruken al ter cuere.
Van welken die ambassaduere
Gheenen last en hadden van dien gheveerte;
Maer des conincs goede begheerte
Namen si ane van desen dinghen
Bi hertoghe Anthonijs te bringhen.
Dus hebben si, na dit volcomen,
Behoorliken orlof ghenomen,
Ende sijn met goeder minlicheiden
Met sconincs gracien ghesceiden,
Opten XX^sten dach, hebbic vernomen,
Van oeghste, ende sijn tAntwerpen comen,
Daer si den hertoghe, wilt verstaen,
Haer relatie hebben ghedaen.