Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXXV.

Hoe die hertoghinne aen hueren oem den coninc van Hungeren weder screef.

Hier op soe screef altehant
Die hertoghinne van Brabant
Aen haren oom in deser wijs:
Dat die hertoghe Anthonijs
Met sijns selfs live in Vrankerike
Gheweest hadde, ende haestelike
Daer weder moeste riden, tzwaer,
Om dorloghe te brenghene daer
In goeden vreden oft in bestant;
Mids dien en mocht hi te hant
Niet ghecomen bi siere ghenade.
Twelc zi selve ooc en dade,
Want zi wat ziec was, wats gheschiet;
Ende bat hem, dat hi dat niet
Voor evel en name in gheender wijs.
Voort screef si, dat hertoghe Anthonijs
Ende si ieghenwoordichlijc
Met harer bootscap treffelijc
Haer vriende, sonder lanc verhouden,
Bi siere ghenaden senden souden;
Bat hem, dat hi met sijnder weerden
Tot LX personen ende peerden
Volcomen gheleide met sinen brieve
Oversenden woude met lieve;
Soe dat doen bliken, na dinhouwen,
Die voorseide brieve van mijnre vrouwen
TAntwerpen ghescreven, dat es waer,
Int voorseide Ons Heeren iaer,
In julio, doe ic u ghewach,
Opten XXIX^sten dach.