Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXXIII.

Hoe die hertoghinne screef aen den coninc van Hungeren hueren oem, ende wat hij in der zaken vorscreven oordineerde.

Als hertoghe Anthenijs hadde beseven
Hoe die coninc van Hongheren hadde ghescreven
Over hem, hoe ende twi,
Ende sunderlinghe na dat hi
Met sinen brueder, den hertoghe Jan
Van Bourgognen, den edelen man,
Bi middele des greven twaren
Van den ghescille verenicht waren,
Dat tusschen Antwerpen ende Mechelijn
Langhe in twiste hadde ghesijn,
Alsoe dat vore bescreven staet:
Soe nam hertoghe Anthonijs raet
Met sinen heeren, sonder verhouwen,
Maghen, vrienden ende ghetrouwen,
In wat vueghen of in wat weghen
Hi hem vorderen mocht daer ieghen.
Ten utersten waert hi soe te zinne,
Dat mijn vrouwe die hertoghinne
Int iaer voorscreven, doe ic ghewach,
In januario den XVIII^sten dach,
Na costume, zi u bekant,
Van den hove van Brabant
Ende des stichts van Camerike,
Sant enen man gheestelike,
Broeder Goeswine, die prior was
Van den Carthuysen, sijt seker das,
Te Zelem bi Diest, des neemt goom,
Aen den coninc van Hongheren haren oom,
Die tier tijt was in Lombardien,
Ende screef hem sonder vertien
Met haren brieve, hoe ende twi
Trecht, dat hertoghe Anthonijs ende si
Op tlant hadden in alder wise
Van Lutzenborch, om pantschewise
In handen te houdene met lieve,
Na uutwisen der maiesteit brieve,
Haers ooms des conincs van Behem;
Entie hertoghe ende si met hem
In dier manieren ende op dien zin
Tlant van Lutzenborch hadden in
Haer handen ghenomen ende anders twint.
Hertoghe Anthonijs, dat versint,
Heeft metten selven prior voorscreven
Aen den greve van Savoyen ghescreven,
Sinen zwagher, uit trouwen fijn,
Die ghetrouwet hadde die zuster sijn,
Die bi den coninc, verstaet mijn woort,
Seere heimelijc was ende wel ghehoort;
Ende zant den greve, alsoe dat drifte,
Een volcomen instructie met ghescrifte,
Die van Lutzenborch van vore tot na
Die zaken begreep et cetera,
Om yoor den coninc sonder cesseren
Te verantwerden ende texcuseren,
Soe dinstructie begreep dat,
Oft behoefde teenegher stat.
Na dat die prior vore verclaert
Sijn brieve hadde ghepresenteert
Ende sijn bootscap eerst ghedaen,
Eerst aen den greve ende daer na saen
Aen den coninc, des seker sijt,
Ende hi ghevolght hadde enen tijt
Om ghetriveleert te wesen,
Heeft die coninc voorghelesen,
Bi middele ende toedoene, segghic di,
Des cardinaels Placentijn
Ende voorschreven greve, ic zeker ben,
Op tslot te Yporegien,
Int iaer XIIII hondert, doe ic ghewach,
Ende den XXIII^sten dach
Der maent van meie, gheordineert,
Ghesloten ende gheverificeert
Dat hi die voorweerden al,
Pacten, conventien, groot ende smal,
Die ghemaect sijn, des sijt vroeder,
Tusschen den coninc sinen broeder
Van Behem in enegher wijs,
Ende den hertoghe Anthonijs,
Wilt hebben ghehouden nu voort an
In volcomender macht; alsoe nochtan
Dat mense niet voorder trecken en sal
Dan si spraken, alsoe die al
Sijn brueder van Behem heeft bescreven,
Ghelooft, bezeghelt ende ghegheven.
Ende mids dat doen volcomeliken
Die voorweerde niet en conde ghebliken,
Ordineerde die coninc sonder bliven
Van Hongheren, dat hi soude scriven
Aen sinen brueder den coninc vri
Van Behem; bidden hem, dat hi
Sinen raet ghelast senden wille
Om af te legghene die gheschille,
Die tusschen den hertoghe Anthonijs
Ende heer Huwaerde, in enegher wijs,
Van Eltere, ende sijn helperen
Uut stonden, die te termineren
Ende na redene ende bescheiden
Te beslechtene met wijsheiden;
Binnen welken middelen tiden
Dat die gheschille in beiden siden
Wesen souden ghetermineert,
Soe wilt die coninc ende begheert
Van Hongheren, beveelt sonder vermyen,
Dat tusschen die voorscreven partyen
Onderhouden werde een vast bestant.
Voort gaf die coninc al te hant
Den greve van Savoyen te kennen claer,
Dat thertoghedom van Brabant waer
Verstorven op dat Roomsche rike:
Begheerde dat namaels bi ghelike
Richteren worde oversien
Tbescheet daer af; niet mids dien
Dat hi den hertoghe Anthonijs
Tlant nemen woude in enegher wijs;
Maer om te wetene van inde toorde
Wient metten rechte toebehoorde.
Bevonde men in enegher mate
Dat die hertoghe met rechte besate,
Soe bleve hem dan int openbare
Tghene dat van rechte sine ware;
Ende opdat men bevonde echt
Dat den rike na enich recht
Verschenen ware in enegher wijs:
Wilde hijt hertoghe Anthonijs
Nochtan gheven, ende laten
Die beneficien tsijnre baten,
Ende die goedertierenheit bekinnen
Te hemwerts in allen zinnen;
Alsoe dat blijct bi den brieve,
Die de greve screef met lieve
Van Savoyen, doe ic ghewach,
In junio den XIIII^sten dach,
Int iaer dusent, sijts ghewes,
Ende IIII^c, alst voorscreven es.