Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXXII.

Hoe de stede des lants van Lutzenborch den coninc van Hungeren Antwerde screven.

Op welke brieven in goet besorch
Die steden des lants van Lutzenborch
Den coninc hebben, sonder begheven,
Int langhe verhaelt, antwerde ghescreven,
Hoe alle zaken daer int verclaren
Gheschiet ende toecomen waren;
Ende zunderlinghe si hem weten deden,
Hoe dat si, in tiden voorleden,
Den hertoghe van Orliens ende desghelijc
Joose den mercgreve rijc,
Van Brandenborch ende van Meeren heere -
Twelc hen beval die coninc zeere
Van Behem, soe sijt wel hadden verstaen, -
Hulde ende eede hadden ghedaen
Van ghehoorsaemheiden: want
Tlant van Lutzenborch in hant
Teenen zekeren pande hem stelde
Voor een groote somme van ghelde;
Ende voort, dat die coninc voorscreven
Van Behem, sijn brueder, hadde ghegheven,
Haer natuerlijc heere, dat wet,
Siere nichten Elizabeth,
Ende hertoghe Anthonise van Brabant
Van Lutzenborch tvoorseide lant,
In handen gheset ende ghewelde,
Voor een somme van huweliken ghelde
Dat hi daer op hadde bescreven hem;
Entie zelve coninc van Behem,
Met sinen edelen monde met lieve,
Ende met sinen maiesteit brieve,
Hen hadde bevolen in allen zinne
Den hertoghe ende der hertoghinne
Van Brabant, na behoorlijcheden,
Hulde ende eet van ghehoorsaemheden
Te doene alsoe, met goeder lieve,
Na vorme ende luut van den brieve
Des conincs van Behem, haers heeren;
Ende baden daer omme na begheren
Den coninc van Hongheren, dat hi der zaken
Der gheenre die de werringhe maken
Int lant van Lutzenborch voorscreven,
Niet licht gheloove en wille gheven,
Noch gheen onredelijc onderwijs
Hooren en wille in gheenre wijs,
Noch hem ooc aenkeeren des
Ghelijc dit met vele poenten es,
Ende andere redene claer beseven
In de brieve der antwoorden, gehescreven
Te Lutzenborch, dat zi u cont,
Op sinte Mertens avont,
Int voorscreven Ons Heeren iaer
Dusent CCCC XIII, dits waer.