Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXX.

Van den tractate tusschen Antwerpen ende Mechelen.

Van Simpoel die heere notable,
Tier tijt van Vranckerijc connestable,
Heeft in die chele dus vercleert
Van den scepe souts, dat ghearesteert
Te Mechelen lach gheschut al doe,
Dat die van Lovene hoorde toe,
Dat soude sijn onghearesteert,
Vri ende los ghetriveleert;
Ende dat die voorseide stede
Van Lovene ende Bruessele mede
Als van den soute, hoort mi rueren,
Dat zi dat voort selen vueren
Op ende neder, sonder ghile,
Door die Senne ende door die Dile;
Dat zijt selen moghen useren
Sonder fraude oft distorberen,
Alsoe si daden, en lieghe u niet,
Ter tijt dat hertoghe Philips verschiet
Van Bourgognen, dat elc versta,
Een iaer vore ende een iaer na.
Item die heeren, hoort mi ontbinden,
Selen haer commissarise sinden:
Mijn heere van Bourgognen voor ghenant
Sal sinden te Lovene in Brabant,
Te Bruessele ende tAntwerpen mede;
Mijn heere van Brabant in die stede
Van Mechelen, te sijnre lieve,
Privilegien, chartere, rechte ende brieve
Te oversiene, daer hem mede
Behelpen willen die voorseide stede,
Van des den ghescille aen mach cleven
Tusschen die drie stede voorscreven;
Ende die collationeren dan,
Nemen ende bringhen copie daer van,
Om in handen gheleit te wesene
Onser heeren uutghelesene;
Ordeneren, termineren te mael
Van den faite principael.
Item van der schade ende cost, zi u vercleert,
Van den ghevanghenen, die ghearesteert
Gheweest sijn binnen den tide
Ter eenre ocht ter ander zide,
Es gheaccordeert, doe ic ghewach,
Een dachvaert opten XX^sten dach
In loumaent, verstaet die conde,
In der stat van Dendermonde,
Bi den commissarise der heeren
Om die debatte te apointeren.
Item der twee heeren uutghelesen
Commissarise selen wesen
Op die debatte, verstaet den fijn,
Tusschen Antwerpen ende Mechelijn,
Ghemechticht, gheladen te tracteren,
Te termineren ende te apointeren,
Soe wel van den clachten, wilt verstaen,
Die die van Antwerpen hebben ghedaen
Van den mercten alsoe wael,
Als van den faite principael.
Noch ander ghescille van partyen
Vergaven die heeren in beide syen;
Maer dan dient tonser materien niet,
Daer om makics gheen bediet.
Hier met sijn die heeren met minlicheden
Deen van den anderen ghesceden.