Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXIX.

Noch van den gheschille tusschen Antwerpen ende Mechelen.

Als die hertoghe Anthonijs voorseit
Bracht hadde tsiere ghehoorsaemheit
Dlant van Lutzenborch ende bewaert
Met sinen lieden, trac hi ter vaert
In Brabant. Als hi daer quam,
Dat ghescille hi noch vernam
Open staende, dits waerheit fijn,
Tusschen Antwerpen ende Mechelijn;
Dat in siere absentien was
Meer verherdet, sijt seker das,
Dan doen hi uut Brabant sciet.
Alsoe deen stat der andere niet
Van hem beiden, hebbic vernomen,
Enich goet lieten toecomen,
Ghedoochde elc van hem nochtan
Dat dander steden af ende an
Van Brabant, van Vlaendren, soe mi dochte,
Alrehande goet toecomen mochte.
Maer [want] binnen der absentien, sijts wijs,
Van den hertoghe Anthonijs
Ende Lovene, ende Bruessele, soe ic voorseide,
Van te tracteerne tusschen beide
Aflieten, soe u wel cont mach sijn:
Soe en woude die stat van Mechelijn
Niet ghedooghen, dat die stede
Van Lovene ende van Bruesele mede
Visch, zout ocht haver, hoert mi rueren,
Door haer vriheit souden vueren;
Welke twee steden in alder wijs
Dit claeghden den hertoghe Anthonijs.
Om welke zaken hi sinen lieden,
Hertoghe Anthonijs, dede ghebieden
Op groote pene, dat niemant
Uut ocht ooc dore sijn lant
Van Brabant enegherhande dinghen
Toevoeren en soude noch bringhen.
Met welken verbode stringhe ende hert
Mechele alsoe bedwonghen wert,
Dat si vervolgden, segghic di,
Aen hertoghe Ianne, soe verre, dat hi
Maken liet een dachvaert
Die tAntwerpen ghehouden waert;
Daer doen alsoe overquamen
Die ghebroeders beide te samen
Van Bourgognen, van Brabant tien tiden,
Met veel heeren in beiden siden,
Die zi daer brachten in dat caboel.
Onder dandere was daer van Simpoel
Greve Walraven, die wise heere,
Des hertoghen Anthonijs zweere,
Die welke aerbeite zerre ernstelijc
Tusschen beide die broederen rijc,
Soe dat, bi middele van hem, ende wille
Beide der ghebroeders, van dien ghescille
Ende van meer andere, overquamen
Die ghebruedere beide te samen,
In der manieren van al ende al,
Soe ic u hier na scriven sal
Int corte die substantie claer,
Alsoe sijs overquamen daer,
Uter copien die ic selve las,
Ghelijc als daer ghededinct was.