Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXVI.

Hoe heer huwaert van Elteren hertoghen Anthonise niet hulden en woude.

Als nu die hertoghe, segghic di,
Danviller ende Mommody
Inhadde, versocht hi ter vaert
Den voorschreven heere Huwaert
Ende sijn metplichteren met lieve,
Dat si, na inhout sijnre brieve,
Die hi hadde onder hem
Van den coninc van Behem,
Huldighing daden ende eet.
Daer op antwoorde wel ghereet
Heer Huwaert ende die sine met hem,
Dat zi den coninc van Behem
Verbonden waren, sonder si,
Met eede; mids dien en mochten si
Niemenne el eet doen van trouwen,
De eerste en ware quijt ghescouwen;
Ende soe wanneer dat teenegher tijt
Die coninc den eet hem scolde quijt,
Soe souden si den hertoghe coen
Gheerne eet ende huldinghe doen,
Ghelijc dander edele, sonder waen,
Des lants van Lutzenborch hadden ghedaen.
Om heer Huwaerde ghenoech te sijn
Ende sinen metplechteren, zant int fijn
Die hertoghe, om dese dinc
Te condeghene den coninc;
Twelc aenghehoort, heeft die voorscreven
Coninc weder brieve ghegheven
Onder sinen zeghel der maiesteit,
Int jaer Ons Heeren, si u gheseit,
Twelve ende veertien hondert,
Daer hi met quijt scilt elken besondert
Hulde ende eet, daer met si hem,
Als enen coninc van Behem,
Ende van Lutzenborch ooc meere
Als haren natuerliken erfheere,
Plichtich ende verbonden waren;
Ende beval hem sonder sparen,
Dat si den hertoghe Anthonise
Hulden souden in derre wise,
Ende eet doen met alder lieve,
Na uutwisen sijnre brieve
Die hi hem hadde verleent, dats claer;
Welke brieve die hertoghe daer
Becundeghen dede, groot ende smal,
Heer Huwaerde ende sinen helperen al,
Ende al den edelen ende ondersaten,
Die int lant van Lutzenborch saten,
Op een ghemeine dachvaert
Die int stat van Aerle ghehouden waert;
Op dewelke brieve voorscreven
Heer Huwaert antwerde heeft ghegheven
Ende sijn metplechteren: ‘wats ghesciet,
Dat si en gheloofden niet,
Dat enichsins die brieve twaren
Bi weten des conincs verleent waren.’
Doen wort verdraghen sonder verhouden,
Dat zi selve scicken souden,
Te wetene zijn eintelike meininghe claer.
Dus hebben si ghesonden daer
Heere Willeme Van Ham ter vaert
Ende van Bourscheit heere Bernaert;
Denwelken die coninc een voor al
Van Behem met sijns selfs monde beval,
Ende ooc met brieven, sonder laten,
Dat zi, ende alle ondersaten
Des lants van Lutzenborch, sonder verhouden
Den hertoghe Anthonijs hulden souden,
Na uutwisen sijnder brieve,
Die hi hem hadde verleent met lieve.
Na allen desen, si u verclaert,
En heeft die voorseide heer Huwaert,
Noch sijn metplechteren, in gheenre wise
Den voorscreven hertoghe Anthonise
Huldinghe ghedaen noch ghehoorsaemheit;
Maer bleven in wederspennicheit.