Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXV.

Van den tractate ende hoe hertoghe Anthonijs inne ghecreech Damvilleer ende Mommody

In den eersten was besproken, soe wie
Inhebben soude die slote drie:
Damviller, Montmedy, Orchimont
Met haren behoorten, zi u cont,
Van weghen des alder doorluchtechsten
Roomsch coninc ende van Behem,
Ende sijns brueder, si u cont,
Van Hongheren coninc Zeghemont,
En selen die selve voorscreven
Drie slote niement innegheven
Noch aftreden in gheenen keere,
Dan dien dalre doorluchteste heere,
Die coninc van Behem, sal ghelieven
Bescriven met sinen openen brieven,
Uuthanghende, dat was onderscheit,
Metten zeghele der maiesteit:
Soe wie si waren, groot of smal,
Dat mense dien ingheven sal.
Ooc sal men weten ende verstaen
Datse die ghene selen ontfaen
Ende innemen dan te hant
Van heer Huwaerde van Eltere - want
Hi die slote inhadde te voren
Van den doorluchteghen vorste vercoren,
Des Roomschen ende Beemschen coninc,
Ende van weghen, verstaet die dinc,
Des hertoghen van Orliens -
Ende niemene ingheven enechsens,
Dan in alder maten, sijts ghewes,
Als dat boven beredent es,
Op verbeurnesse harer goede vermoghen,
Dat si hebben of crighen moghen.
Oec es te wetene in allen keere,
Dat of die selve, een of meere,
Binnen den tide ghebeurde te sterven,
Dat God verbiede! soe selen die erven
Ende al haer goede verbonden wesen,
In alder maten voorghelesen.
Dus worden die slote in hant ghegheven,
Op die voeghe voor bescreven,
Heeren Robbrechte, die vrome was zeere,
Te Florchinghen ende te Boxsey heere,
Ende Gielise van Rodemach
Heere te Rithersperch, doe ic ghewach,
Ende heeren Janne, in ghewelt
Die heere was te Duchervelt,
Om hueders [daer] af tsine ende ruwaert,
In alder manieren vore verclaert;
Ende van den sloten ende steden voorscreven
Hadde sijn recht op ghegheven
Die van Orliens, ende ghestalt
In der twee coninghen ghewalt.
Heer Robbrecht, Gielijs ende Jan voorscreven
Hebben haer brieve hierop ghegheven,
Aldinc te doene in der mate
Na inhout van den tractate.
Na dit tractaet, in corten stonden,
Soe heeft die hertoghe ghesonden
Sijn notabel ambassiaet
Aen den Roomschen coninc, sonder verlaet,
Tot Praghe in Behem, als die wise:
Willem, greve te Zeyne, ende Gielise
Van Rodemach ter selver stonde,
Ende met hem meester Emonde
Van Dyntere, voorsienich ende wijs,
Des hertoghen secretarijs,
Die aen den coninc van Behem voorseit
Metten zegle der maiesteit
Enen brief verworven, dat men ter stont
Danviller, Mommody ende Orchimont
Overgave, opende in alder wijs
Den voorscreven hertoghe Anthonijs.
Uut crachte des briefs, sonder si,
Wort Danviller ende Mommody
Den hertoghe Anthonijs sonder lette
Overghegheven, die hi besette
Ende inne nam; maer na tgone
En vraeghde heer Hughe, heer Huwaerts sone,
Niet en twint te dier stont,
Die noch inhadde Orchimont,
Twelc hi den drien heeren voorscreven
Niet en wilde overgheven
Na vorme des tractaets, seggic di,
Voor Danviller ende Mommody.
Hoewel die coninc van Behem
Bevelende ernstelijc screef aen hem,
Dat hijt dade sonder verlaten,
Soe en woude hijt doen in gheenre maten.