Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXIV.

Hoe hertoghe Anthonijs anderwerf in den lande van Lutzenborch trac.

Int jaer van XII, doe ic ghewach,
Cort voor Sinte Jans-Baptisten dach,
Hief die hertoghe ane sijn vaert
Ten lande van Lutzenborch waert,
Om te verwachtene oft iement soude
Comen, die innemen woude
Die slote, als vore, int tractaet
Voor Eltre ghemaect, ghescreven staet;
Ende belach met sijnre rote
Teenen male die stede ende slote
Danviller ende Montmedy,
Verwachtende daer met moede vri,
Of die hertoghe van Orliens,
Ocht iement anders, her of ghens
Van sinen weghen daer ghesonden,
Tien daghe verschenen, of zi conden,
Die slote te winnene of tontsetten;
Twelc hi hoopte te beletten
Met sijnre macht ende avonture.
Maer daer en quam noyt creature
Jeghen hem, soe ict vernam;
Ende als niement daer en quam,
Den dach voorleden, soet was voorseit,
Soe waest in een tractaet gheleit,
Alst blijct in den brieve aldus
Beghinnende: Wi Anthonius .....