Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXIII.

Van den tractate tusschen hertoghe Anthonise ende her huwaerde van Eltere.

Als heer Huwaert dit verstont,
Dat smaecte hem qualijc in sinen mont.
Als hi die zake gheware wort,
Heeft hi hem nederweert ghegort,
Ende en hielt niet op, sonder cesseren,
Hi en begonst te spreken om tracteren.
Alsoe ten utersten, dat verstaet,
Wert ghededinght een tractaet,
Daer die substantie hier neven
In corten woorden af steet bescreven:
Eerst es voorwaerde, si u cont,
Dat Damviller, Montmedy, Orchimont
Heer Huwaert inne behouden sal,
In alder voeghen groot ende smal,
Dat die vrede inhielt, min noch meere,
Tusschen onsen ghenedighen heere,
Den coninc van Behem edel ende hoghe,
Ende van Orliens den hertoghe;
Welc vrede duren sal openbare
Tot Sinte Jans daghe, ende daer nare
Enen dach; ende hierenbinnen
Sal ic, heer Huwaert, doen te kinnen
Den coninc van Behem ende voort meere
Van Orliens den grooten heere;
Ende ocht die coninc te dien daghe,
Ocht die van Orliens, niet versaghe
Die slote in te nemen, als dan
Soe en sal ic, Huwaert, mi voortan
Der slote niet meer voort bewinden,
Noch niemant van minen weghen sinden;
Maer ses weken, des sijt ghewis,
Saelt vrede sijn, na tcompromis.
Op dat ooc soe vallen moghe,
Dat die coninc ende die hertoghe
Mi scriven met eendrechticheit,
Dat ic die drie slote voorseit
Iemenne soude mechtich maken,
Soe ne sal ic niet doen die zaken,
Ic en saelt eerst condeghen, zi u bekant,
Onsen ghenadeghen heere van Brabant,
Oft iemanne die van hem draeght besorch
In der borch te Lutzenborch,
XIIII daghe al uut ende al,
Eer ic daeraf sceiden sal;
Ende oft ic binnen dien XIIII daghen
Scade, commer of cost moest draghen,
Oft helpe van volke behoefde dare,
Dat hi mi die sal senden nare
Op sinen cost, wilt mi versinnen,
Ende alle cost die hierenbinnen
In bewaren der slote voorscreven
Ghedaen sal sijn, dien sal mi gheven
Ende uutrechten, zi u bekant,
Ons ghenedeghe heere van Brabant
Binnen eender maent, sijts wijs.
Ooc en sal hertoghe Anthonijs
Binnen desen middelen tide,
Hi noch de sine, in gheender zide
Die slote enichsins aentasten,
Archwilleghen, scadeghen of belasten;
Maer voor alle arch behueden zal
Als sijns selfs slote over al.
Ooc en sal ic, Huwaert, voort meere
Mi richten ieghen minen heere
Met clachten, of met eneghen dinghen
Van mijner scaden zunderlinghen,
Die ic heb leden in desen zaken,
Mi pinen eneghen twist te maken;
Maer sal moghen met sueter bede
Den coninc van Behem, van Ungheren mede
Oetmoedelijc bidden, wel tot dien
Dat zi mijn scade willen versien.
Dit mach ic doen hier ende daer
Tot Sinte Jans misse ende enen dach naer.
Alle dit tractaet bi rechter trouwen
Ghelovede heer Huwaert wel te houwen.
Vele meer woorde, dat verstaet,
Heeft begrepen dat tractaet;
Maer dat en dient niet zeere te scriven,
Daeromme latict achter bliven.
Dit tractaet ghesciede, dats waer,
Als men XIIII^c Ons Heeren iaer
Ende XI screef, doe ic ghewach,
Voor Paesschen, in meerte den XII^sten dach.
Na dit tractaet, si u bekant,
Keerde die hertoghe in Brabant,
Ende daer bleef hi, doe ic ghewach,
Tot bi Sinte Jans-Baptisten dach
Metten vrouwen bancketteren,
Steken, breken, dansen, hoveren,
In Sonien jaghen, dats waerhede,
Twelc hi alte gheerne dede,
Ende ooc alle andere dinghen
Die hem ende sinen lande aenghinghen.