Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XXII.

Hoe hertoghe Anthonijs ende sijn vrouwe te Lutzenborch ontfanghen worden, ende hoe hi Elteren belach.

Int jaer van XI met grooter minnen
Trac met siere ghesellinnen
Die edele hertoghe Anthonijs
Int lant van Lutzenborch, sijts wijs,
Daer si ontfaen worden lieve,
Na uutwise des conincs brieve:
Van prelaten, van steden al gheheel,
Ende van den ridderscape tmeeste deel
Ontfinghen den hertoghe ter vaert;
Maer van Eltre heer Huwaert,
Die van sconincs weghen alsdan
Van Behem daer was hootsman,
En woude den hertoghe noch siere vrouwen
Hulde noch eet doen van trouwe,
Noch sijn helperen, si u gheseit,
Als heer Bernaert heere te Bourscheit,
Jan van Brandenborch, die doe was
Heere tot Essche, sijt seker das,
Ende van Brandenborch Frederijc,
Heere tot Clerve gheweldichlijc,
Heer Diederic van Endelsdorp, heere
Te Wildenberch, ende daertoe meere
Heer Heinderijc van Bollant,
Heere tot Rolley wide becant,
Godert heere tot Brandenborch,
Dat hi als heere hadde in besorch,
Ende die jonghe heer Willem van Ham,
Heer Jan van Soye, soe ic vernam,
Ende heer Gheraert van Vastenaken,
Ridderen, ende in der zelven zaken
Gheraert van Vastenaken, sijn sone,
Jan ende Willem, merket tgone,
Van Orley, twee ghebroeders vri:
Dese bleven alle heer Huwaerde bi
Ende contrarie des hertoghen.
Dus es met heercrachte ghetoghen
Voor Eltre hertoghe Anthonijs,
Dat hi beleide in vromer wijs,
Ende dede dat in allen vormen
Met bussen bescieten ende bestormen,
Soe dat heer Huwaert uut noden
Heimelijc scicte sijne boden
Aen den hertoghe, claghende zeere,
Van Orliens, de welke heere
Aen marcgreve Joose hadde verpant
Die slote hier na ghenant:
Damviller, Montmedy, Orchimont;
Welke drie slote te dier stont
Her Huwaert hadde in sijn ghewelt.
Ende was daer capitein ghestelt
Van des hertoghen weghen voorscreven
Van Orliens, daer hi gescreven
Sijn brieve aen heeft, met beden groot
Datti hem bistonde tsiere noot;
Uut desen dat die hertoghe sant
Heer Clingette van Brabant,
Die welke quam met grooter macht
Van volke van wapenen, datti bracht
Om Eltere tontsettene, des sijt wijs.
Dit wert den hertoghe Anthonijs
Verbodet, doe ic u ghewach,
Int heer daer hi voor Eltere lach;
Ende dat die vorseide Clinget
Ghemaect hadde sijn opset
Om Eltere tontsettene, conde hi,
Ende was comen tot Montmedy
Met sinen hoope, doe ic u cont.
Als hertoghe Anthonijs dat verstont,
Liet hi rechtevoort ter vaert
Sijn heer voor Eltere wel bewaert,
Ende reet selve int besorch;
Met hem die greve van Vernenborch,
Die joncheere van Montiouwen ende heer Aert
Van Crayenheem, al onghespaert,
Ende veel meer andere te dien berechte
Beide ridderen ende knechte.
Ende toghen in den nacht te samen,
Alsoe dat zi des morghens quamen
Seere vroech tot voor Montmedy,
Ende daer soe bevochten si
Heer Clingets liede, des sijt vroeder.
Daer wert ghevaen heer Clingets broeder,
Ende alle dander sonder verdraghen
Worden ghevanghen of gheslaghen,
Sonder heer Clinget, die te vooren
Op tslot was gaen misse hooren:
Dus bleef hi onghevanghen daer.
Hertoghe Anthonijs keerde daer naer
Int heere voor Eltere in corten stonden.
Die ghevanghen heeft hi al omme ghesonden
In steden, in sloten, int besorch
In den lande van Lutzenborch.