Brabantsche yeesten. Les gestes des ducs-de-Brabant par Jean de Klerk d'Anvers (3 delen)

XVII.

Hoe hertoghe Anthonijs van hertoghe Willeme van Beyeren groete sommen van Gelde ghecreech.

Als hertoghe Anthonijs met vromen
Tsinen lande aldus was comen,
Bedacht hi donrecht herde saen
Dat siere [vrouwen] moyen was ghedaen,
Ende den lande desgelijc.
Daer bevant hi claerlijc,
Soe dat vore vercleert es eldere
Van hertoghe Reinoute van Gheldere,
Dat sijn moye grooteleke
Van hertoghe Willem was in ghebreke
Van Beieren, grave van Henegouwe,
Die siere moyen, der grooter vrouwe,
Haer duwarie sculdich was
Van haers mans weghen. Mids das
Screef die hertoghe alte hant
Aen zinen zwagher van Hollant,
Om van dier zaken voorseit
Recht te hebbene ende bescheit.
Na vele scrivens, si u verclaert,
Ende na meneghe dachvaert
Ende onderwijs met bescheide,
Hebbens hem die heeren beide
Ghekeert in den hertoghe Jan
Van Bourgognen, die daer van
Een uutsprake heeft ghegheven
Int stat van Risele, alst stont ghescreven
XIIII hondert ende neghen jaer,
In augusto, dat es waer,
Ende heeftse aldus ghepronuncieert:
Mids dachterstel vore vercleert,
Dat hertoghe Willem, des sijt wijs,
Sal gheven den hertoghe Anthonijs,
Van Brabant den hertoghe milde,
LXX dusent ouder schilde,
Te sekeren tiden, wilt verstaen.
Dwelc hertoghe Willem heeft ghedaen,
Ende hertoghe Anthonijs heeft ghegheven
Tgelt van der duwarien voorscreven,
Dwelc was van achterstellicheit
Van der hertoghinnen voorseit,
Vrouwe Johannen wilen eere,
Van greve Willeme, haren heere,
Van Henegouwe; de welke bleef
Voor die Vriesen, als ic voor screef
In den sesten boec hier voren:
Die tpoent daer lasen, mochtent horen.
Noch int selve jaer, sijts wijs,
Mids dat hertoghe Anthonijs
Ghelooft hadde te doene bistant
Hertoghe Willeme van Hollant,
Sinen zwagher, ghetrouwelike,
Jeghen den hertoghe rike
Van Ghelre, ende daertoe meere
Jeghen van Arcle den heere
Ende alle haer helpers met hem:
Soe gaf die hertoghe Willem
Anthonise, om sijn zake te schoonen,
XXIIII dusent vrancscher croonen.